Shillong, K’Lyngkot 16: U Myntri ka tnat kampohïing ka Sorkar Pdeng u Amit Shah un wan shaka Meghalaya haka 19 tarik mynta u bnai ban pyniaid iaka jingialang Plenary Meeting jong ka North Eastern Council (NEC) kum u Lamphang.
Kane ka jingialang kan long hapoh ka State Convention Centre Shillong.
U Myntri ka tnat DoNER, Tourism bad Culture ka Sorkar Pdeng u G Kishan Reddy, un shimti kum u symbud Lamphang bad u Myntri khynnah DoNER u BL Verma, lem bad kiwei ki ophisar ka DoNER bad NITI Aayog kin don bynta lang ha kane ka jingialang.
Ha kane ka sngi, ki Lat bad ki Myntri Rangbah jong baroh ki Jylla ka thain Shathei Lam Mihngi (North East) bad ki Chief Secretaries lem bad kiwei ki heh ophisar kin don bynta lang ha kane ka jingialang.
Kiwei ki kynhun naduh ka Assam Rifles, NEEPCO, NHIDCL, NEDFi, NERCORMS, NERAMAC, NEHHDCL, NESAC bad ka NIC kin iadon lang.
U Amit Shah un pyllait ruh iaka NEC Year Book ha kane ka sngi bad u Secretary ka NEC u K Moses Chalai un kren pdiang sngewbha katba u Secretary ka DoNER u Chanchal Kumar un kren halor ka ki kam ka bala leh daka DoNER.
Iaka jingpynkhreh lane ka Pre-Interaction Meet hapdeng ki Chief Secretaries ki Jylla ka NE States, ki Secretaries jong ki Central Ministries, ki dkhot ka NITI Aayog, ki Director General (Assam Rifles) bad ki Planning Secretaries ka NER yn pynlong haka 18 tarik mynta u bnai.
