Guwahati, Risaw 19 :U Myntri Rangbahduh (PM) ka ri u Narendra Modi un pynlong ka jingwan jngoh ia ki jylla ka thain shatei lammihngi (Northeast), kata ia ka Tripura bad Arunachal Pradesh ha ka 27 bad ka 28 tarik mynta u bnai.
Watla katta ia kane ka jingwan ka jong u PM Modi yn dang pynthikna kham hadien.
“Lada u PM Modi un leit jngoh ia ka Arunachal Pradesh ha ka 27 tarik mynta u bnai, un leit jngoh ia ka Tripura ha ka 28 tarik lane u lah ban wan shwa ha kane ka jaka ha ka 27 tarik mynta u bnai,” ong u Myntri Rangbah (CM) ka Tripura u Manik Saha.
Ha Tripura, u PM Narendra Modi un iashim bynta ha ka jingialang paidbah bad ruh un buh ia u mawnongrim na ka bynta ki katto katne ki projek.
Lah ban kdew ba ia ka ilekshon assembly ha Tripura lah ban pynlong ha ka shiteng jong u snem u ban wan.
Kumjuh ruh ha ka jingleit jngoh ia ka Arunachal Pradesh, u PM Modi u lah ban iashim bynta ha kaba plie ia ka kad liengsuin Donyi Polo airport.
