Shillong, Rymphang 14 : U Myntri kam Pohiing ka Ri bad Nongialam ka BJP Amit Shah un wan iuhkjat arsngi ha Ri-lum Garo ban khroh ia ki paidbah ba kin ai ka jingkyrshan ia ka BJP ha kane ka elekshon MLA ban long la 27 tarik mynta u bnai.
U Amit Shah un pynlut por 2 sngi ha Ri-Lum Garo kata ha ka 16 bad 17 tarik bad un iashimbynta ha ki katto katne ki rally ha ka thain.
U Amit Shah un poi ha Turoi ha ka 16 tarik Janmiet bad un iashimbynta ha ka jingialang paidbah ha Tura shuwa ban un lum ia ka jingilang bad ki Nongialam ka Ri-lum Garo ba kynthup naduh ki District President, Mandal President, ki kyrtong bad kiwei kiwei ki nongkitkam.
Ha ka 17 tarik, un iakynduh ia ki Nongialam Niam bad hadien un iashimbynta ha ka jingialang paidbah ha Tikrikilla bad Raksangiri,Garo Badha, Dalu bad Baghmara, Resubelpara bad Mendipathar.
Shuwa u Amit Shah, u National President ka BJP Jagat Prakash Nadda un wan sha Jylla ha ka 14 bad 15 tarik ban ialap elekshon ha Nongbah Shillong.
