Shillong, Jylliew 22 : Ka North East Students Organisation (NESO) kala pynbna ban pynlong da ka jingiathang mombiti ha manla ki Nongbah jong ki Jylla ka thain, ka ban long la 28 tarik Jylliew, na ka bynta ban kyrpad ha kaban wanrah noh ia ka jingsuk ha Manipur haba kyntu ruh ia u Myntri Rangbah Duh ban kein noh ia ka jingsngap jar jar.
Ha ka kyrwoh, ka NESO kala pyntip ba kan pynlong ia kane ka jingthang mombiti khnang ban kyrpad ia baroh ba kin sangeh noh ia ka jingiaumsnam khnang ba ka jingshongsuk shongsain kan wan phai ha Manipur.
Ka NESO pynpaw iaka jingsngewsih halor ka jingiai bteng ka jingiaumsnam hapoh ka jylla Manipur ha kaba ki iing k isem kila shah pynjulor bad la duh ruh ia ki mynsiem briew.
Katkum ka kyrwoh khubor na u Chairman ka NESO u Bah Samuel B Jyrwa bad u General Secretary u M Thobu kila pynpaw ia ka jingsngewlem ia ka jingmad jingjynjar ki paidbah ka jylla Manipur bad kila wer ban pynneh noh iaka shongsuk shongsaiñ bad ban pynsangeh noh ia ki kam iaumsnam ne jingpynjulor ia ki jingdon jingem.
“Ka NESO ka kyntu ia baroh ki nongshong shnong jongka Manipur ba kim dei ban ngeit bad ban pynsaphriang ia ki khubor thok ne ia kino kino ki jingpyntip kiba nang pynsniew shuh shuh iaka jinglomng jingman kaba don mynta” ong ki nongialam ka NESO.
Ka NESO ka kynnoh iaka sorkar jylla bad iaka sorkar pdeng halor ka jingbym ler ka jongki ban tehlakam bad ban pynsangeh ia ki kam iaumsnam watla kala don palat ia ka 45 sngi bad watla u Myntri Kam Pohiing ka ri ula leit iuhkjat bad kila don ruh ki shipai palat iaka 40,000 ngut ha Manipur.
“Ka NESO ka dap da ka jingkyndit bad jingsngew lyngngoh iaka jingsngap jar jar jong u Myntri Rangbahduh ka ri halor ka jingjia ha Manipur. Kane ka jingsngap jar ka jongu kan nang pynjngai shuh shuh ia ki riewlum jong ka thain shatei lam mihngi. Ka NESO ka kyntu ia u Myntri Rangbahduh ka ri ba yn kren eiei, lem kumta ka sorkar pdeng ka don iaka jingthmu sha lyndet halor kane ka jingbym kren eiei” ong ki nongialam ka NESO.
Pule lang ia kane: Sam ka Murmu ia ka khusnam Florence Nightingale sha ki Nos, ioh ka kong Reliance na Meghalaya
