Shillong, Iaiong 10 : Ka jaka shang pyngngad ba pawnam ka Shillong-ka Nan Polok (Ward’s Lake) kan sa hap biang sha ka jingkhmih jong ka Tnad Tourism, kaba la mang mynta haduh T.18 klur ban shna ia ki jingtei ki ban pynbyrngia ia ki nong wan shangkai sha Shillong.
Haba pyntip ia kane ha ka sngi Palei, u Myntri ka Tnad Tourism Bah Paul Lyngdoh ula ong “Ngi la jam shakhmat bad ka jingpynphai biang ia ka Nan Polok, kaba bat mynta da ka tnad Forest & Environment. Ka Nan Polok kumba phi tip, wat ka jingkieng, kaba itynnad bad ba paw bha, ka dei kaba ju don bad ka Tnad Tourism hynrei namar ki katto katne ki daw, la shimti bad sumar da ka Tnad Forest”.
“Hynrei mynta ngi la rai ha ka jingialang bala pyniaid da u Myntri Rangbah ba yn sa pynphai biang sha ka Tnad Tourism. Katba ngi dang iakren, ngi la dep ban mang ia ka song pisa ba T. 18 klur na ka bynta ban nang pynitynnad ia kane ka nan kynthup ki jingtei kum ka cafes, sound ^ light show bad kiwei kiwei” ula bynrap.
Ula pynbna ruh ba ka por ban khang ia ka Nan Polok la pynjlan na ka 5 baje janmiet sha ka 10 baje mynmiet.
“Hadien ba ngi la dep shimti pura ia kane ka nam, ngin sa pynthikna nyngkong eh ban pynkylla ia ka por, ka por khang kan ym long shuh 5 baje janmiet, kan dei 10 baje mynmiet bad kan dei ruh ka jaka ban iai kai pynngad bad pynbyrngia ia ki nongwan shangkai sha Shillong, kiba ju ud ia ka jingbym don eiei ha Shillong ha ka por mynmiet” ong u Bah Paul.
“Kane kan iarap ruh ia ki Nongtrei Sorkar jong ngi, phi tip ba ki Ophis ki khang 5 baje janmiet bad ka nan ka khang 5 baje janmiet. Ki dei ban ioh ia ka por ban leit iaid kai bad kilan met ha kane ka jaka” ula bynrap.
 kan sa hap biang sha ka jingkhmih jong ka Tnad Tourism, kaba la mang mynta haduh T.18 klur ban shna ia ki jingtei ki ban pynbyrngia ia ki nong wan shangkai sha Shillong.){kind=link}