Shillong, Nohprah 20: Namar ka jingpynkhreh iaka Christmas, ka tnat Shillong Traffic Police (STP) kala pynbna ban pynlong ia ka jing talasi kali haki katto katne ki jaka ha nongbah Shillong ban pynthikna ba kan nym don kano kano ka jingjia aksiden bad ki jingjia ba sngewsih.
Lyngba ka kyrwoh, u Superintendent of Police (City) ula ong ba ki jaka ba ki Pulit kin talasi kin kynthup haki surok Bypasses, surokbah (highways) bad ki surok shnong bad lada lap ia kino kino kiba niah kali bad ka buaid palat (30 mg. per 100 ml. ha ka blood) kin shah pynshitom hapoh ka kyndon Section 185 MV bad ka kuna T. 10,000 lane shah set along haduh 6 bnai lane shah pynshitom baroh ar.
“Ka Shillong Traffic Police (STP) kan pynleit jingmut bha ha kaban bat ia kiba niah kali hapdeng ka jingbuaid bad ba niah khlem akor jingniah nalor ki jing pynkhien iaki kyndon MV Act namar kane ka dei kaba buh jingma” ong ka kyrwoh.
U SP ula kyntu iaki ba niah kali ym tang ba kin niah shngain hynrei ban kiar ruh ia ka jingniah kali hapdeng ka jingbuaid ban pynthikna ym tang ia ka jingshngain ialade shimet hynrei ia kiwei ruh kumjuh.
