Yn sdang ka Swachhata 5.5K Run na ïing u Lat ha ka 2 tarik u Risaw

Shillong, Nailur 28: Kum shi bynta jongka jingrakhe ia ka sngikha jong u Mahatma Gandhi bad ka jingrakhe ia ka Swachhata Hi Seva, ka Raj Bhavan, Shillong ryngkat ka jingiatreilang bad ka Central Bureau of Communication, Shillong, Sorkar India bad ka ophis District Sports Officer, East Khasi Hills District Sorkar Meghalaya, kan pynlong ia ka “Swachhata 5.5K Run” ha ka 2 tarik Risaw 2024 bad kane ka jingiakob mareh kan sdang bad kan kut hi ha Raj Bhavan, Shillong.

Ka Swachhata Run kan sdang na Raj Bhavan, Shillong ha ka por 7 baje mynstep bad yn plie paidbah da u Lat ka Jylla u C. H. Vijayashankar.

Ka lynti na ka bynta kane ka jingmareh kan long St. Anthony’s College, Shillong College, St. Mary’s College, Don Bosco Square, Iew Laitumkhrah, Fire Brigade, St. Edmund’s School, Malki Point, Barik Point, Civil Hospital, Main Secretariat, DC Office bad kan kut ha Raj Bhavan, Shillong.

Ki khusnam ha ka Open Category na ka bynta ki shynrang bad kynthei ki long khusnam bawan nyngkong T.5000, Baar T. 3000 bad Balai T.2000 bad kin don ruh ki khusnam kba yn ai mar T.1000 na ka bynta ki kyrdan ba 4 haduh 8 bad yn ai T.1000 ia ki rangbah bad ki longkmie kiba la 50 snem shaneng kiba wan ha ka kyrdan 1 haduh 5.

Lah ban pynrung kyrteng ha katei hi ka jaka naduh 6 baje haduh 6:45 mynstep ha ka 2 tarik Risaw, 2024. Ka link na ka bynta ka jingthep kyrteng online ka long https://bit.ly/3Y3wqhv.
Yn sam ia ki nombar ha ka 2 tarik Risaw, 2024 naduh ka por 6 baje mynstep haduh 6:45 mynstep ha ka jaka kaban sdang ka jingiakob mareh bad ki nongiashim bynta kin ioh ei ia ki sopti Swachhata bad ki jingbam jingdih.