SHILLONG, Naiwieng 08: Ka Tyrna Elaka Sidarship haka jingiatreilang bad ka Tourism Management Committee jong ka Dorbar Shnong kan sa pynlong iaka jingrakhe dap 125 snem ka shnong Tyrna.
Kum shi bynta ban rakhe iaka jingdap 125 snem jong ka shnong, Ka komoiti kan pynlong ruh iaka 2nd Living Root Festival naduh 7 bad 8 tarik Nohphrah 2022.
Haba kren sha ki lad pathai khubor u bah Donborwell Marbaniang ula iathuh ba ka komiti ka la pynkhreh shi bun ki prokram naduh ki jingpyni nam ba bun jait, ki jingshad, ki jingrwai tynrai jong thain kum shi bynta ban pyni nam iaka jingriew spah ka thain Tyrna.
U bah Donborwell u la iathuh ba ka shnong Tyrna kadei kawei na ki shnong kaba riewspah bha ha ka jingpynmih ia u Sohñiamtra bad kumjuh ruh kaba khring bha iaki nongwan shang kai na kiwei ki jylla ka ri India bad kumjuh ruh na sytllak ka pyrthei.
“Ka jingthmu ban pynlong biang iaka Living Roots Festival 2022 kadei naka bynta ban pynheh pynsah ia ka mei mariang bad kyntiew ia ka kam jngohkai hapoh katei ka thaiñ Tyrna” la ong u bah Donborwell.
U bah Donborwell u la iathuh ba iaka tamasa Living Root Festival la pynlong nyngkong eh ha u snem 2018 hynrei la sangeh noh shwa ha u snem 2019, 2020 bad 2022 namar ka jingwan lynshop ka khlam Covid-19.
U la iathuh ba ha kane ka tamasa ba mynta kan don ruh ka jingiakop thei bhabriew naka bynta ki samla kynthei jong ka Shella konstiwensi kiba dang 18 snem haduh 25 snem.
“Kiba jop iaka jingiakop thei bhabriew lane ka Ms Living Root kadei T. 30,000 iaki ba jop, T. 15,000 iaki ba wan ba ar bad T. 10,000 iaki ba wan ba lai” la ong u bah Donborwell.
