Shillong, Nailur 11: Ka All Primary School Teachers’ Association (APSTA) hynne ka sngi Nyngkong, kala pynbna ban rakhe ia ka lyngkhuh sngi iap ba 174 snem u Thomas Jones ia uba la tip kum “U Kpa ki dak thoh bad pule ha ka Khasi”.
Ia kane ka jingkynmaw burom yn rakhe ruh kum shi bynta ban kynmaw ia ka lyngkhuh snem ba 181 ka jingsdang ia ki Lower Primary skul ha kine ki Lum Khasi bad Jaintia.
Ia kane jingrakhe mynta u snem yn pynlong haka 16 tarik mynta u bnai ha madan Umkor Urksew ha Pynursla haka jingdon lang u Symbud Myntri Rangbah ka jylla bah Prestone Tynsong bad u Myntri ka tnat pule Rakkam A Sangma lem bad kiwei kiwei de.
Ka APSTA ka kyrpad jur ia baroh ki dkhot na ki Unit bapher ba kin sngewbha ban poi ha katei ka sngi bad ruh ban ialeh shitom ban poi ha shuwa ka por.
Ha kane ka sngi ka APSTA kumba ju leh naduh ka snem 1992 kan noh synniang mar T.50 hajar sha ka Christmas Make Over 2023, sha ka Parish Pynursla bad sha ka NEIMA ha Pynursla.
