Guwahati, Risaw 08: Ka kynhun myntri ka sorkar Assam hynnin ka sngi Thohdieng ka la shim ia ka rai na ka bynta ban pynlong ia ki eksam na ka bynta ki klas 5 bad 8 ha kaba lada u/ka khynnah kiba phiel kin hap ban shong biang ha kajuh ka klas.
Ka kynhun myntri ka Assam ka la pynbna ruh ba ka sorkar jylla kan pynlong ia ki eksam na ka bynta ki khynnah klas 5 bad 8 ha baroh ki skul ba la pyniaid da ka sorkar jylla.
Na ka liang ka sorkar jylla ka la dep lypa ban pynkylla ia ki katto katne ki kyndon kiba iadei bad ka Right to Free and Compulsory Education Act, ha kaba ki khynnah skul kiba pule ha ka klas 5 bad 8 ki dei ban pass ha ki eksam ba shisien shi snem ki jong ki khnang ba kon lah kiew klas.
Kham hashwa hapoh ki kyndon jong ka Right to Free and Compulsory Education Act, 2009, la kdew shai ba na ka bynta ki khynnah klas 1 haduh klas 8 ka jingpynlong ia ki eksam kaba man ka shisien lai bnai kam shym la kdew satia halor ka jingpass jingphiel jong kino kino ki khynnah. Kata kaba mut ba ki khynnah kila dep pass lypa na ka bynta ban kiew sha kawei pat ka klas.
Hynrei ha u snem 2019 la pynkylla ia kane ka Act, bad lyngba kane kino kino ki khynnah ki bym lah ban lehbha ha ki eksam jong ki kin shah pynshong biang ha kajuh ka klas ha ka snem kaba bud.
Kumta ruh da kaba bud halor kane ka jingpynkylla ia kane ka Act, ka kynhun myntri ka Assam ha ka 7 tarik mynta u bnai ka la shim ia ka rai ba naduh mynta baroh ki khynnah ki dei ban pass ia ka eksam klas 5 bad 8 ia kiba yn pynlong manla ka snem. Lada ki khynnah ki phiel ha kine ki eksam, mardor yn pynlong biang ia ki eksam ba kyrpang na ka bynta jong ki hapoh ka ar bnai bad na ka liang ki nonghikai jong kine ki jaka pule kin khmih kyrpang na ka bynta kine ki khynnah khnang ba kin pass ha kane ka eksam.
Hynrei lada jia ba ki khynnah ki dang phiel ha kane ka eksam ka ba kila ailad kyrpang kumta ruh kin hap ban shong biang ha kajuh ka klas.
