TURA, Jylliew 17: Ki Balang Catholic kiba don ha rilum Garo, hynne ka sngi Sautjaiñ kila iakynduh lang ha Bishop House, Tura ban iakren ha kaba iadei bad ka jingjia kaba ktah ia ki paidbah jong ka jylla Manipur namar ka jingiaumsnam kaba dang bteng haduh mynta.
Ha kane ka jingialang la wan ban iashimbynta da ki nongialam ka Balang Catholic na ki Parish bapher bapher kiba don ha nongbah Tura, kynthup na ki Cathedral, Sacred Heart, Tura, Araimile, Danakgre bad Walbakgre, ha kaba la iadonlang ki Bishop jongka Tura, u Most Rev. Andrew R. Marak bad Most Rev. Jose Chirackal.
Ka jingthmu jong kane ka jingialang ka long ban iatai halor ka jinglong jingman haka jylla Manipur kaba la ktah bha ia ki paidbah lyngba ka jingmih jong ka jingiaumsnam.
Ki nongialam Balang kila shim ia ka rai ban shimkhia bad ban leh eiei ha kaba iadei bad ka jingeh kaba mih na katei ka jingiakynad bad kila don ia ka jingthmu ban buh jingduwai kyrpang na ka bynta ki paidbah kiba shah ktah bad ban pan ia ka bor na u Blei ba yn tular bad iarap ha kum kane ka por kaba mynta.
Nalor kane, yn pynlong ruh ia ki Rally Paidbah kum ka lynti ban pyni iaka jingdon iaka jingsngewlem na ka bynta kito kiab la shah ktah na katei ka jingiaumsnam bad kine ki Rally kidei da ka jingthmu ban pynsngewthuh ia ki paidbah ia ka jingjia bad kumjuh ban pyni ba ka Balang ka ai iaka jingkyrshan ban wanrah iaka jingsuk, jingbishar hok bad ban pynkut noh ia ka jingiakynad.
Da ka jingmih ryntih ki paidbah, ki ngeit skhem ba kin ai mynsiem ban don ka jingiatylli bad ka jingpynkhiah ia kito ki jaidbynriew kiba la mad iaka jingshem lanot.
Ka long ruh kaba ai mynsiem ban iohi ba ki nongialam jong ki Balang Catholic kila mih shakhmat ban shimkhia ia ka mat kaba ktah iaka imlang sahlang bad ka jingpyrshang ka jongki ka pyni ba ki don iaka jingkitkhlieh ban kyntiew iaka jingsuk, jingbishar hok bad ban sngewlem ia ki briew kiba la mad iaka jingeh bad jingjynjar.
Pule lang ia kane: Taplup ka khyndew ia 2 ngut ki Dkhot ka Tarari Choir ha ka jingtwa khyndew ha Nongstoin
