Shillong, Nailar 14: Da ka jingthmu ban ialeh ban rat dyngkhong ia u Drok bad ban iarap ia ki samla kiba kyrni ban lait na une u jingdih ba sniew, hynne ka Lah Sngi U Blei, ka Seng Samla Mawkhar bad ka NRE Pageant India Private Ltd, kila pynbna ban pynlong ia ka Awareness Programme ha ka 19 tarik u Nailar ha Community Hall jong ka Dorbar Shnong Mawkhar.
U President ka Seng Samla Mawkhar u Bah Daniel Syngai, haba iakren bad ki nongthoh khubor, ula ong ba ka jyllei jong u drok hapoh ka jylla kala nang kiew, kumta ka jingthmu ban pynlong ia kane ka Awareness Programme ne jingpynshai paidbah, ka long ban ai jingiarap ia ki samla ban lait na ka jingkyrni na ki jingdih pynbuaid kiba sniew bad ka jingpynlong ia katei ka prokram kadei ruh shi bynta ka jingrakhe ka Seng Samla Mawkhar ia ka jingdap 25 snem.
Katba u President ka NRE Pageant India Private Limited u Bah Ransom Sutnga, u la ong ba ka kompani jongu ka kloi ban iadon ryngkat lang ban ai ka jingkyrshan ia kane ka prokram, khamtam haba kane ka prokram kam dei eh tang ban shu pynsngewthuh paidbah halor ka jingsniew jong u drok hynrei kadei ruh ban pynsaphriang iaka lad jingiada ia kiba kyrni ha u drok da kaba pyndonkam da ki dawai kynbat kiba lah ban shna hi ha la ïing.
Na ka liang jong ka Executive Director ka NRE Pageant India Private Limited, Kong Eldora Lyngdoh kala ong bunsien ha ki jingpynshai paidbah ka long tang ban pynsngew ia ka jingsniew jong u drok hynrei katei ka prokram kan kham pher na kiwei pat, namar ba yn ai ia ki lad jingiada ban lait na ka jingkyrni ia u drok da kaba pyndonkam ban dih da ki dawai kynbat.
Kala iathuh ba u Ayurvedic Practioner na New York u Tenzing Tsering un wan ai iaki jinghikai halor ki dawai kynbat kaba ki briew kiba kyrni ki lah ban dih bad ka jingwan jongu kadei namar ba la jyllei ka jingdon ki briew kiba pyndonkam ia u drok uba la ktah ym tang ia ka longïing longsem, ka imlang sahlang bad ia ka jylla baroh kawei.
