Shillong, Risaw 06 : Ka Khasi Jaintia Church Leaders Forum (KJCLF) kan pynlong ia ka jingduwai kyrpang “Ban duwai lang na ka bynta ka jingbha” ha ka 7 tarik Risaw, ban pynpaw ia ka jingkhia jong ka kam ba iadei bad ka jingthmu jong ka Sorkar ban wanrah ia ki ktem khalai Casino hapoh ka Jylla.
Haba pyntip ia kane ha ka sngi Balang, u Secretary ka KJCLF Rev Edwin H Kharkongor ula ong ba kane ka jingiakynduh lang ban iaduwai kyrpang kan long ha KJP English Service Church, Police Bazaar, Shillong.
Ula ong baka KJCLF kala shimkhia ia ka jingpyni bym suidniew jong ki bor Sorkar ban khang ia ki ktem khalai casino bad ban pynduh noh ia ka Meghalaya Regulation of Gaming Act, 2021.
Haba antad ba shibun ki jingsniew bad ki jingktah kin wan na kine ki kam khalai, u Rev Kharkongor ula ong baka Forum ka khot ia baroh ki Nongialam jong ki Seng Niam, Sengbhalang bad kiwei kiwei ki bor ba kin ai ka jingkyrshan ia kane ka jingiakhih ha kaban khang pyrshah ia ki ktem khalai casino ha ka Jylla.
Ha ka 29 tarik Nailur, u Myntri Rangbah ka Jylla Conrad K Sangma ula ong ba ka jingkren jong u hapoh ka Iingdorbar Thaw Ain ba iadei bad ka nongrim ba ka ieng ban nym wanruh shuh ia ki casino ka dei kaba hap ban shimkhia da baroh ki kynhun.
“Namar kata, kum u Myntri Rangbah nga la dep ban kren, nga sngew ba kane ka jingkren ka dei ia kaba hap ban shim khia bad kito ki briew kiba dang artatien ki dei ban ngeit ba lada u Myntri Rangbah ula dep kren ha ka Iingdorbar, ka mut ba ka dei ka kam kaba mut shisha” ula ban jur.
Hynrei haba ban jur ba ka jingpynduh ia ka MGRA kan nym mih satia, u Conrad ula ong “Ban pynduh kumba nga ong kam dei satia ka mat ba ngi kwah ban iasyllok namar kane ka Ain ka teh kyndon ia baroh ki kam khalai kaba dei kaba donkam bha hynrei ka jingkylli ban plie ia kine ki jaka khalai thymmai lah dei ban khang ia mynta bad ngin ym pyniaid shuh shakhmat tad hadien ba ngi la dep iasyllok bad baroh ki kynhun bad ngin sa peit ia ka jinglong jingman bad sa shim rai”.
Kat kum ka jingong jong u, ka jingthmu jong ka Sorkar ka long ban pynbiang tarajur ba ka Jylla kan ym duhnong ne iohnong ha kaba ia kane ka khalai yn buh ha khappud ba marjan ka Guwhati, bad ba kan nym ktah ia ka Jylla baroh kawei hynrei kan ioh pat ia ka khajna kaba lah ban kot ia ka T.500 haduh T.600 klur ka ban sa wan sha ka Jylla.
