Shillong, Iaiong 25 : U Symbud Myntri Rangbah ba khmih ia ka Tnad PWD (Road) Bah Prestone Tynsong ula pyntip ba ka National Highways & Infrastructure Development Corporation Limited (NHIDCL) kan sa pynkhreh ia ka Plan kumno ban tehlakam ia ka jingtwa khyndew ha Rngain kaba don ha surok na Shillong sha Dawki.
Hadien ba pynlong ia ka jingialang hynne ka sngi Ba-ar, u Bah Prestone ula pyntip ba la iatai sani halor ki jaka ba jur ki jingtwa khyndew bad kila (NHIDCL) ithuh ia katto katne ki jaka bad kumno ban tehlakam namar ka long ka jingma da ka jingwan jong ka aiom lyiur mynta.
“Ngi la dep iakren ia baroh kiba donkam. Ki briew jong ka NHIDCL kin sa pynkhreh ia ka action plan ba kumno kin leh bad ban pynthikna ba kan buh ia ka kynhun ki ban khmih lada mih kino kino ki kam ba kyrkieh ha baroh 24 kynta man ka sngi” ula ong.
Ia kane ka rai la shim hadien ba arngut ki briew kila iap na ka jingtwa khyndew kaba shyrkhei ha Rngain.
Haba kylli ia kaei ka jingpynshitom bala shim pyrshah ia u contractor, u Symbud Myntri Rangbah ula ong “La pyntip sha nga da ka NHIDCL ba kala pynkut ia ka jingaikam pyrshah ia ka ARSS namar ka jingtrei torti. Kumta, ka Head Office jong ka NHIDCL kala pynwai ia ka soskular bala iateh bad ka ARSS, kaba pyntrei ia ka Package-II kaba dei naduh Mylliem haduh ka by-pass Pynursla”.
Ha kajuh ka por, ia ka package-I, package-4 bad package-5 ruh la iakren ha kane ka jingialang ha kaba la bthah ia ka NHIDCL ban sdang noh mar mar ia ka jingkhot tender ia kine ki bynta jong ka surok Shillong-Dawki.
