Shillong, Rymphang 04: U Myntri ka Tnad Community & Rural Development AT Mondal ha ka sngi Ba-ar ula ong ba ka jingpynkha ia ki C&RD Block ba thymmai ka dei ka kam kaba iaid na ka por sha ka por.
Haba kren sha ki lad pathai khubor, u Mondal ula ong “Ka dei ka kam kaba iaid na ka por sha ka por. Lano ka Sorkar ka sngew ba ka long kaba donkam ban plie ia ka Block thymmai, kumta hi ngi ruh ngin leh ia kata. Ngi la iohi ia ki jingdawa jong ki paidbah bad ruh ia ka jingdonkam na ka Sorkar Jylla”.
Haba kren halor ka jingplie dang shen ia ka Mawhati Block, u Myntri ula ong ba kane ka Block ka dei kaba don sha ka jaka ba kyndong bha jong ka Jylla.
“Bun ki briew ki hap ban iaid haduh 80-90km ban leit sha ka block headquarter ha Umsning bad dei kane kaba pynlong ia u Myntri Rangbah ban pyrkhat ba ka por kala dei ba ka Mawhati ka dei ban don noh la ka jong ka Block khnang ba baroh ki kam pynroi kin wan hi na ka thain bad dei kane ba la pynkha ia ka Block ha katei ka jaka” ula ong.
Haba kylli, u Mondal ula ong ba ki jingdawa ban pynkha ia ki Block thymmai ki don beit bad ka Sorbar ka dang bishar hashuwa ba kan ai ka jingmynjur.
