Nongpoh, Risaw 17: Ka kynhun ialehkai football jong ka Umrit Sport Club ka la ioh ban rah syndon ia ka nam lahduh ha ka Western Ri Bhoi League ba la pyniaid da ka Western Ri Bhoi Sport Association bad mynta kane ka kynhun kan pynkhreh ban leit mihkhmat pat sha ka Meghalaya State League kaban sa pynlong shen da ka Meghalaya Football Association (MFA).
Kane ka nam lahduh ka la wan hadien ba ka kynhun jong ka Umrit Sc ka la lah ban pynliem noh ia ka kynhun jong ka Mawskei Them Fc da 4-3 kol ha ka jingiakhun ia ka phainal jong ka Western Ri Bhoi League kaba la poi sha ka tie breaker.
La pynhap ia katei ka lympung ialehkai jong ka WRBSA da u Bah Sosthenes Sohtun, MLA ka Jirang Konstituensi kum u kongsan ha ka jingiadonlang ruh u Bah Victor Rani, MLA kum u symbut kongsan, ki riew rangbah na ka thaiñ Jirang ki nongïalam ka WRBSA ba kynthup ïa u Bah Active Pator President, Bah Epnas Thangkhiew Secretary bad kiwei kiwei ki riew rangbah.
Ha ka jingiakhun ban iohrah ia ka nam lahduh jong katei ka Football league, ka jingiakhun ka la long kaba iakhaid bormet bha ha kaba ki rangialehkai na baroh ar kynhun ki la iakhun dohiap bad ruh ban sei ia la ki sap ki phong hynrei haduh ba kut baroh ar kylla ka jingiakhun ka la kut noh hapdeng ka jingiakhaid tad haduh ba ki nongpyniaid ki la rah noh sha ka tie breaker bad ka kynhun jong ka Umrit ka la ioh rah ia ka nam lahduh da ka thep kol 4-3 kol.
Ka kynhun jong ka Umrit Sc kan ioh ban leit mihkhmat na Western Ri Bhoi Sport Association sha ka Meghalaya State League kaban sa pynlong shen da ka Meghalaya Football Association.
Kane ka ka la ioh ruh ban khung ia ka song pisa 50 hajar ha ryngkat ka trophy bad ka kynhun jong ka Mawskei Them Sc ka la iohrah 30 hajar.
