Nongpoh, Naitung 03: Ki kynhun ialehkai phutbol jong ka skul Saiden Secondary School bad ka Mynken Christian Higher Secondary School, kila ioh ban mihkhmat ia ka Ri-bhoi District sha ka lympung ialehkai jong ka State Level Subroto Cup.
Kine ki Kynhun ialehkai kila ioh rung sha kane ka lympung ba heh ka Jylla hadien ka jingioh khur ia ka lam lahduh ha ka Inter District Subroto Cup Tournament ba dang shu kut ha Ri-Bhoi District.
Ka Kynhun ialehkai ka Saiden SS ka dei ka kynhun ki Kynthei kaban ialehkai ha ka U-17 katba ka Skul Mynken Christian HSS kan phah haduh artylli ki kyndon ki shynrang-kawei jong ka U-14 bad kawei jong ka U-17.
Ha ka jingiakhun ia ka phainal jong kane ka District Level Inter School Subroto Cup Football Tournament 2023 kaba la pynlong da ka ophis u District Sports Officer Ri Bhoi District, la sakhi ia ki jingiakhun kiba shongkun bad kiba iakhaid bha ha kaba ha ka thup jong ki kynthei, ka kynhun jong ka Saiden Secondary School ka la long ka lahduh da kaba pynliem noh ïa ka Mynken Christian Hr. sec. School da 1 kol la 0 ha ka kyrdan U-17.
Ha ka thup jong ki shynrang ha ka U-14 Boys, ka Mynken Christian Hr. Sec. School ka la pynliem Noh ïa ka Umsning Presbyterian Sec. School da 2 kol la 0 bad ha ka U-17 jong ki shynrang ka Mynken Christian Hr Sec. School ka la long ka nongjop lyngba ka jingïa shoot Tie Breaker pyrshah ia ka Nongjri Presbyterian Sec. School.
La wan ban pynhap pyrda ia kane ka lympung ialehkai football jong ki skul ba la pynlong da ka ophis u DSO, da ka Kong P L Nonglait, District School Education Officer ha ka jingiadonlang ruh u Bah S Pasleiñ DySP ka Ri Bhoi Police, u Bah Bobby L Nongbet DSO Nongpoh lem bad kiwei kiwei ki riew pawkhmat.
Also read: Sha Delhi yn leit tynruh u CM halor ka jingeh ki samla Pule ka Jylla namar ka CUET
