Shillong, Rymphang 11 : U Myntri Rangbah ka Jylla Conrad K Sangma un leit ban pdiang ia ka lama jong ka Indian Olympics Association (IOA) la 14 tarik Rymphang ha Halwandi, Uttarakhand, kum ka dak ka jingshimti ka Jylla ban pynkhreh ia ka 39th National Games ha Meghalaya.
Ia kane ka lama ka IOA yn aiti da u Myntri kam pohiing ka Ri Amit Shah ha ka jingialang pynhap pyrda ia ka 38th National Games kaba dang iaid mynta ha Halwandi, Uttarakhand, ha ka jingiadonlang ka President ka IOA-ka PT Usha, u Myntri Rangbah ka Uttarakhand Pushkar Singh Dhamu bad Myntri kam ialehkai ka Ri Rekha Arya.
Ia u Myntri Rangbah ka Jylla yn synran lang u Myntri kam ialehkai Bah Shakliar Warjri bad ki Heh Ophisar ka Jylla bad ki Nongkitkam ka Meghalaya State Olympics Association (MSOA).
Ka IOA kala phah ia ka shithi sha ka Jylla ba pyntip ba ka Meghalaya kala shah jied ban pynlong ia ka 39th National Games, ka ban long ha u bnai Rymphang-Lber 2027. Ia kane ka lympung ialehkai yn pynlong ha Shillong bad katto katne ki jingia lehkai kin long ha Tura bad ha Jowai.
Ia kane ka lympung ialehkaiyn pynlong hapoh ka Jylla ha ka jingrakhe ka Jylla ia ka lyngkhuh 55 snem ka jingioh jylla la ka jong.
“Ka National Games ka dei ka dak jong ka jingiaid lynti ka Ri ban sei ia ka sap ba tbit ha ki kam ialehkai. Ka dei ka burom ia ka Meghalaya ban ioh pynlong ia kane ka lympung bad pynioh lad ia ki samla jong ngi ban iashimbynta ha ki jingialehkai bapher bapher” ong u Myntri Rangbah.
U Myntri kam ialehkai Bah Shakliar Warjri ula ong “Ka Meghalaya kala sakhi ia ka jingroi sted ki kam ialehkai ha kine ki khyndiat snem bala leit bad ka long kaba la khreh ban shah niew kum kawei na ki Jylla ba khlain bha ha ki kam ialehkai jong ka Ri. Ngi phaikhmat ban pdiang ia ki nongialehkai bad ki nongieid jingialehkai ba kin wan sha Meghalaya”.
Ka 39th National Games ha ka jingshisha ka dei kaba la buh ban pynlong ha u snem 2022 hynrei la pynjlan namar ka jing wan lynshop ka khlaw Covid bad la pynkylla ruh iaka jaka ban pynlong. Naduh katei ka por, ka Jylla kala pyndonkam ia ka por ban tei ia ki madan ialehkai bad kyntiew ia ki kam ialehkai ha Jylla nalor ban kyrshan ia ka jingroi ki riewdonsap.
Kane ka jingpynbna ban pynlong ka Meghalaya ia ka 39th National Games kala wan ruh hadien ba ka Meghalaya kala paw ha ka National Games ba dang iaid mynta ha Uttarakhand, da ka jingioh khur haduh 5 tylli ki takma. Ka Jylla kala sdang ban pynkhreh ia kane ka lympung ialehkai ha ryngkat ka jingiatreilang bad ka MSOA bad ki kynhun ialehkai bapher bapher.
