Shillong, Nohprah 04: U Deputy Commissioner & Chairman ka District Disaster Management Authority, East Jaintia Hills District hynne ka sngi Balang ula pynbna ba ha ka 5 tarik u Nohprah yn khang ia ki kali rit bad kali heh ban iaid na ka surokbah National Highway-6 naduh na Lumshnong shaduh Malidor naduh ka por 7 baje mynstep haduh 3 baje mynsngi.
Ka jingkhang ban iaid ki kali kadei na ka bynta ban ioh ban shna bad maramot ia katei ka surokbah kaba la sniew khnang ba yn lah ban pyndep kloi ia ka kam.
Ha ka jingpynbna paidbah, u DC ula pyntip, ba la mana tyngeh ia ki kali ban iaid ha ki bynta jong katei ka surok bad la kyntu ia ki nongleit nongwan ban buh jingmut lypa ha ka rukom pynkhreh ia ka leit ka wan ka jongki bad ban thied lypa ia ki marbam mardih kiba donkam ha kitei ki por.
Ka jingkhang ia katei ka surok kadei namar ka jingdonkam kyrkieh ban leh ia ki kam kiba kongsan na ka bynta ka jingshngain jong ki nongleit nongwan bad ha katei ka por la mana tyngeh ia ki kali ba kin iaid, tad lada dei na ki kam kiba long kyrkieh bha katta ruh da kaba ioh jingbit na ki bor kiba dei khmih ia ka jingpyniaid kali.
Tang ki kali kiba donkam kyrkieh ne ki kali kit nongpang yn pyllait ban ioh iaid na katei ka surok kaba la khang katba kiwei pat ki kali kin hap ban iaid noh na kiwei pat ki surok katkum ka jingbthah jong ki bor kiba pyniaid kali.
La kyntu ruh ba ha ka por mynmiet dei ban khmih bniah bha ia ki jingthoh ne jingkdew ban lait na kano kano ka jingjia ba sngewsih ha ka jingpyniaid shakhmat ia katei ka kam, khamtam eh ha ki jaka kiba kongsan kaba don ia ki jingkieng, jaka kiba khun, kiba don thliew ha ka jingpyntrei ia ka kam.
