Itanagar, Iaiong 24: Ban pynkhlain ia ka jingpyniasoh ha baroh ki thain khappud jong u Line of Actual Control (LAC) hapoh Arunachal Pradesh, na ka liang ka sorkar India ka la pynieng haduh 254 tylli ki tower 4G network ia kiba yn pyntreikam hapoh ki 336 tylli ki shnong.
Katkum ki khubor, kane ka sienjam kan plielad halor ka jingdonkam kaba iadei bad ka jingpyniasoh lyngba ki kor internet bad broadband sha kumba 70,000 ngut ki nongshong shnong kiba shong ba sah hajan ki bynta jong u LAC sha ki bynta khappud ka India. Kane ka sienjam ka la wan long wat hadien ba na ka liang ka China ka dang iai bteng ban pyniar ia ki jingtreikam hajan ki ja ka khappud jong u LAC.
Kane ka sienjam ba la shim da ka India kan kyntiew ha kaba iadei bad ki jingtreikam jong ki bor shipai ka India bad ki bor pahara hapoh ka thain kumjuh na ka bynta ki nongshong shnong. Ia kine ki tower la wan ban pynieng da ka kompeni Airtel bad BSNL shibynta jong kane ka project ban pyniasoh ia kine ki shnong thain khappud kiba don hajan u LAC.
Ka shnong Zemithang ha Tawang ka don tang khyndiat kilomitar na u LAC. Kane ka shnong kaba la sakhi ia ka jingwantur ki shipai China ha kine ki khyndiat bnai ba la dep mynta ki la ioh ia ka jingpyniasoh lyngba ki mobile tower.
Haduh kumba 15 tylli ki shnong khappud ki la ioh ban pyndonkam ia ka 4G Internet ha ka sien kaba nyngkong naduh ba ka ri ka la ioh ia ka Jinglaitluid.
Sa kumba 1156 tylli shuh shuh ki mobile tower yn pyntreikam ha kine ki sngi ki snem ki ban dang wan.Ka thong ka long ban pyniasoh ha baroh kawei ka jylla jong ka Arunachal kaba don mynta kumba 4,000 tylli ki mobile tower kat haduh u bnai Lber 2024.
