Yn iasoi MoU ka KHADC bad ka CRISP ban wanrah ia ka Policy thungkam hapoh ka Council

Shillong, K’Lyngkot 09: Ka Executive Committee (EC) jong ka Khasi Hills Autonomous District Council (KHADC) kan sa iasoi ia ka soskular Memorandum of Understanding (MoU) bad ka Centre for Research in Schemes and Policies (CRISP) ban wanrah ia ka policy thungkam thungjam hapoh ka Council.

Ïa kane la pyntip da u Chief Executive Member (CEM) ka KHADC u Bah Pyniaid Sing Syiem haba iathuh ba ka CRISP ka dei ka bor treikam kaba la ithuh da ka Sorkar Jylla.

Haba kren sha ki lad pathai khubor, u Bah Pyniaid u la ong ba ka jingthmu jong ka KHADC ban ïa soi MoU bad ka CRISP ka dei kum shi bynta ban bud ryntih iaka jingbthah ka CAG haba iadei bad ka thungkam thungjam hapoh ka Council.

Ula iathuh ba dang shen ka Executive Committee kala wanrah iaka kaiphod jong ka CAG jong u snem 2017-2018 bad 2018-2019 hapoh ka Dorbar Tlang bad ka CAG ka la kdew ba ka don ka jingthungkam hapoh ka Council khlem da pynmih ia ka Advertisement bad khlem da pynlong ruh wat ia ka eksamin thungkam katkum ka rukom kaba dei.

“Wat haki EC bala dep ruh, ki EC ki pyrshang ban wanrah daka Policy hynrei haduh mynta ym pat lah ban pynurlong ia kane.. Ka EC ba mynta ka la iatreilang bad ka Sorkar Jylla bad shen ngin sa iasoi iaka MoU bad ka CRISP ban iarap iaka EC ba kan shna iaki kyndon bapher bapher khamtam haba iadei bad ka thungkam thungjam lane Recruitment Policy” la ong u Bah Pyniaid.

U Bah Pyniaid u la ong ba ka EC kan pyrshang bad kan nym shong kli kti ban pynbha iaka rukom treikam ka District Council katba dang mih ki snem ki por.

Nalor kane, u CEM u la ong ruh ba wat ia ka AD Rule kaba la shna ha u snem 1951 ruh ka dei kaba la donkam ban pynbeit thymmai namar ba ki don ki khep ki bym shai ha ka Rule haba ki don ki jingiathir iatai hapoh ka Iingdorbar Thawain jong ka Council.