Agartala, Iaiong 15: Ka ‘Polia Boishakh’, ne ka jingrakhe kaba nyngkong ia ka snem thymmai jong ki Bengali ne (Bengali New Year) kan long kaba kyrpang na ka bynta ki nongshong shnong kiba dei ki Bengali ka Tripura namar na ka liang ka sorkar hynnin ka sngi Thohdieng ka la pynbna halor ka jingdie ia haduh kumba 5,000 kilo ki dohkha Hilsa ia kiba la pynpoi na Bangladesh ha ka dor kaba bit.
Ia kine ki dohkha Hilsa yn pyniaid iew da ka Tripura Apex Fisheries Cooperative Society Ltd ha ki laitylli ki jaka jong ka iew Maharajganj ha Agartala.
Na ka liang u Myntri ka tnat Fishery ka jylla u Sudangshu Das u la leit ban plie ia kawei na kine ki jaka pyniaid iew hapoh katei ka jaka iew.Ka dor jong ki dohkha kan shong ha ka jingkhia ka jong ki, hynrei kan kham duna haba ia nujor bad ka dor ba ju die barabor.
“Ia kane ka sienjam la shim da ka jigthmu ban pynioh ia kine ki jait dohkha sha ki paidbah ha kum katei ka sngi kaba kyrpang jong ki nongshong shnong kiba dei ki Bengali,” ong u Myntri sorkar.
Ka dor kan long kumba T.770 shi kilo lada ka jingkhia jong kane ka dohkha Bilsa kan long hapdeng ka 500 haduh 800 gram, katba ki nongthied kin hap ban siew shuh shuh T.100 naka bynta ka shi kilo na ka bynta ka dohkha kaba don ka jingkhia kaba hadpdeng 800 haduh 1,000 gram, kane ka long katkum ka dor ba la wah hakhmat jong ki counter.
