Yn ap pahara ki paidbah ha ka sngi ba wan u Conrad
Nongstoin, Naiwieng 18: Ka Dorbar Shnong Ri Muliang kala kyntu ia ki kynhun Sengbhalang ba kim bit ban wan rung ha Shnong ban pynthut ia ka jingwan iuhkjat u Myntri Rangbah ka Jylla Conrad K Sangma, ban plie ia ka Community & Rural Development (C&RD) Block hapoh ka Shnong.
Kane ka rai kala mih na ka jingialang jong ki Nongshong shnong ka thain Ri Muliang kiba don ha ka shatri jong ka Ri Muliang Area Development Council ba long hynne ka sngi thohdieng.
Lah ban kdew hangne ba u Myntri Rangbah ka Jylla un leit ban plie ia ka Ri Muliang C&RD Block ha ka 22 tarik mynta u bna.
Kane ka jingkyntu kala mih hadien ka jingiohi ia ki kynhun sengbhalang ba kynthup ia ka HYC, HANM bad kiwei kiwei kila mih surok ban pynthut ia ka jingleit plie C&RD block u Myntri Rangbah dang shen ha Rambrai bad kumjuh ruh ia ka jingleit iuhkjat u Symbud Myntri Rangbah Bah Prestone Tynsong hynnin ka sngi palei ha Nongstoin.
Kane ka jingmih surok ki sengbhalang ka long ban pynbor ia ka sorkar ba kan pyntrei kam ia ki 9 tylli ki mat jingdawa jong ka Save Hynniewtrep Mission ba kynthup ia ka jingpyntreikam noh ia ka ILP, pynrung iaka ktien Khasi ha ka Riti Synshar, ka bhah thungkam bad kiwei kiwei.
Ka Ri Muliang Area Development Council kala lum ia ka jingialang ba kyrkieh halor ka jingioh jingtip ia ka jingwan plie Block u Myntri Rangbah bad ha kane ka jingialang la iadonlang ki sordar jong ki shnong bapher bapher kiba na katei ka thain kynthup ruh ki nongsynshar hima kynthup ia u bah Phlowel Syiem, Syiem ka Hima Nongmynsaw Syiemship bad kiwei kiwei.
Kane ka jingialang kaba la neh kumba katto katne kynta ka la shim ia ka rai ban buh ruh ia ki volunteer ioh don kiba wan ban pynthud ia ka jingwan iuhkjat u Myntri Rangbah namar la ong ba kan long ka jingpynjah burom ia ka thain hi baroh kawei.
U Sordar ka shnong Nonglang Bah Ailan ula pyntip ba jingialang ka kyntu ia kino kino ki kynhun kiba don ka jingbymsngew hun ba kin sngewbha ban ïaishah shitom tang ha katei ka sngi namar ka dei ka bynta ban lehkmen kum ka thain haba ka thain ka ioh ia kum katei ka jingmyntoi kaba ym shym la poi pyrkhat.
Ia katei ka jingialang la pynlong ha ka shnong Nonglang bad la pyniaid ia ka da u bah W.S.Wahlang Secretary ka Ri Muliang Area Development Council kum u shongknor.
