Guwahati, Rymphang 14: U Police Commissioner ka sorbah Guwahati, u Diganta Barah ha ka 13 tarik mynta u bnai u la pynbna ia ka jingai khusnam na ka bynta baroh ki dkhot ka tnat pulit ki ba don bynta ha kaba pynlong ia ka jingtohkit bad lapdien halor ka jingjia shah rahbor bad shah pyniap jong u Biswajit Hazarika.
Baroh ki don 24 ngut ki heh pulit kiba don bynta ha kaba pynlong ia ka jingtohkit halor katei ka jingjia shah pyniap.
U Barah u la kren ha ka jingialang bad ki lad pathai khubor ha kaba iadei bad ka jingshah rahbor jong u Biswajit Hazarika kaba la jia ha ka 9 tarik u Risaw 2022, katba u dang shong hapoh kawei ka auto richshaw ban wanphai sha la iing.
Ban ia bujli na ka bynta ban pyllait ia une u lanot ba shah rahbor, ki nong rahbor ki la phah ia ka video jong u Biswajit bad dawa pisa haduh T.40 lak.
“Haduh mynta ym shym la ioh jingtip ha kaba iadei bad ka jaka kaba u Biswajit u don,” ong u Barah.Ha ka 1 tarik u Naiwieng jong ka snem ba la dep, kata hadien shi bnai la lapdien ia ka metiap u Biswajit ka bym lah ban ithuh dur na ki bynta jong ka Nellie, Assam.
Ha ka 9 tarik mynta u bnai, ki kmie ki kpa jong utei u lanot ki la kyntu ia u heh pulit ba kin tohkit bniah halor kane ka jingjia bad ban kem ia ki suba donkti halor kane ka jingshah pyniap dusmon u khun jong ki.
Kumta ruh na ka liang ki bor pulit ki la sdang ban pynlong ia ka jingtohkit halor kane ka jingjia shah rahbor bad shah pyniap da kaba ki la kem noh ia hynriew ngut ki briew.
Kitei ki briew kiba la shah kem noh halor ka jingsuba donkti ha katei ka kam pyniap ki kynthup ia u Debajit Deka, Ajay Kalita, Pranab Ranghang, Sanjay Kumar Phagat, Paresh Chetri bad u Mayur Nath.
UAjay Kalita uba shong ba sah ha Panjabari la ong ba u dei u nongsylla ba hakhmat eh ha kaba iadei bad katei ka jingjia shah rahbor bad shah pyniap.
“Ngi la ioh jngtip halor katei ka jingjia lyngba ka jingphla jong u Pranab, u ba la pdiang ba ki la rahbor ia utei u lanot na ka bynta ban kamai pisa da kaba suk,” ong shuh shuh u Barah.
