Shillong, Nailar 21: Ka Meghalaya High Court hynne ka Lah Sngi U Blei kala pynpaw ba kam lah ban pdiang ia ka jingaidaw ba manla ka por ia u slap ba ki surok kila sniew hapoh ka Jylla.
Haba tian bishar iaka PIL, ka Division Bench kaba kynthup ia u Chief Justice Sanjib Banerjee bad Justice B Bhattacharjee kila ong, haba kren kyllum, ka jinglong jingman jong ki surok ha ka jylla kim long kiba biang bad ka jingai daw ba dei namar ka jingslap jur, ka jinglut bun ka pisa ha kaban shna pynbha bad dei na kane ka daw ba la pynsangeh iaka jingshna pynbha ia ki surok ha ka por ba ka bneng ka dang slap.
“Lah dep ban kdew ha kiba bun ki hukum namar ba kadei ka jaka kaba jhieh tam ha ka pyrthei, donkam ban shimkhia bha bad haba tei ia ki surok bad haba pyndonkam ia kino kino ki jingkhleh dei ban nang ha kaban jied bha, da kaba phaikhmat iaka jingjur slap kaba ki surok ki donkam ba kin lah ban shan ne kyrda. Kam long kaba lah ban pdiang ban shu ai daw ba dei namar u slap ba ka jinglong jingman jongki surok kila sniew” kila ong.
Ka Division Bench kala bthah iaka PWD (Roads) ba kadei ban shna pynbha pynbha ia baroh ki surok bad ong, “Ngi kyrmen ba ka PWD (Roads) kan shong pyrkhat bad kan pynthikna ha kaban maramot noh ia baroh ki surok khnang ban pynthikna ba kan don ka jingiaid beit iaid ryntih jong ki kali haka por slap”.
Ha katei ka jingtian bishar, u Executive Engineer, PWD (Roads), Tura, ula aiti ia ka kaiphod ha kaba iadei bad ka jinglong jingman jong ka AMPT Road.
Ka hukum kala ong, ba haka paragraph kaba khyndai jong ka kaiphod, u Executive Engineer ula kdew ba kila don 3 ngut ki kontraktor kiba la pynkhamti ia ka kam na ka bynta ka 33 haduh 41 Km jongka AMPT Road bad ban shna pynbha.
Hynrei u nongujor, uba dei uba shah ktah na katei ka jingsniew palat jong ka surok, ula pynpaw ba ka jingshna pynbha iaka surok kam long kaba la pyntrei ha ka por kaba dei ne man la ka por.
Ha kaba iadei bad ka mat jong ka AMPT Road, yn sa shong bishar biang hadien 6 taiew hadien ba la dep ban aiti iaka kaiphod jong ka jinglong jingman katei ka surok.
Pule ruh: Dawa ka GSU ia ka centre ialeh eksam thep kam ha East Garo Hills
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
