Shillong, Rymphang 11 : U Myntri ka Koit ka Khiah Bah Wailadmiki Shylla ula iada ia u Myntri Rangbah ka Jylla Conrad K Sangma, da kaba ong ba ym donkam ia u ban hiar shuki namar ka Sorkar kala shim ia ka jingkit khlieh ba pura bad kala shim ia ka sienjam ban leh tyngeh ia kito kiba donkti ha ka jingbthei ka par tih dewiong beain kaba jia dang shen ha Mynsngat-Thangsko, East Jaintia Hills, kaba la shim ia ka mynsiem ki 31 ngut ki Nongbylla.
“Ngi la shim ia ka jingkitkhlieh ba pura halor kane bad ngi la shimkhia ban leh tyngeh ia kito kiba donkti, kumta, ngam tharai ba ka donkam ia u Myntri Rangbah ban hiar shuki” ong u Bah Wailad haba iakren bad ki nongthoh khubor haba jubab ia ka jingdawa ki Liang Pyrshah ia u Myntri Rangbah ban hiar shuki.
U Myntri ula pdiang ruh ia ka rai jong ka Iingkashari High Court ban thung ia ka jingtohkit ba laitluid ne da ka Central Agency, haba pynpaw ba ka Sorkar kam don eiei ban buhrieh.
“Ngim don eiei ban buhrieh. Ngi la shimkhia bha ia kane ka kam ta ka daw u Myntri Rangbah ula rai ban pynlong da ka Judicial Inquity..Ngi pdiang ia ka” ula ong.
U pyntip ba ka Sorkar Jylla kan sa iashong jingialang shen bad rai halor ka jingthung ia u Chairman jong ka Judicial Inquiry Commission. “Ka ain kan shim iala ka jong ka lynti” ula ong.
Ha kajuh ka por, u Myntri ula kubur ia ki jingeh ba iakynduh da ki bor synshar ha kaban tehlakam ia ka kam tih dewiong beain ha Meghalaya, haba pynpaw ia ka jinglong jong ki jaka, kaba buh jingeh ban peitngor.
“Ka jaka ka don sha kyndong bha, hynrei khlem pep na ka por sha ka por, ngi la pyrshang kat kaba ngi lah” ong u Bah Wailad haba kdew ia ka jingwan jurip jong u dang shen lem bad u Myntri ka tnad Pule Puthi Bah Lahkmen Rymbui sha kane ka par ba bthei.
U Myntri ula pynpaw ia ka jingkyndit ia ka jingiaid ki kam tih dewiong ba thymmai ha ka thaian, haba pynpaw ba ka Sorkar kam don jingtip satia ia kine ki kam.
“Ngi dang mut baroh shikatta ba u dewiong u dei uba rim bad ba kila shalan ia u. Hynrei ngim don jingtip ba ka jingtih thymmai ka dang jia” ong u Bah Wailad.
Ka Sorkar kala kem haduh 9 ngut ki trai par bad ki nongniah kali kiba donkti ha ki kam beain, lem bad arngut kiba dang shu kem dang shen.
“Ngi la thwet ia baroh, ngin ym ieh iano iano ruh, kiba donkti ha ki kam beain” kular u Bah Wailad.
