Shillong, Jymmang 18: Ka National Food Security Act ka dei a ain kaba pynthikna ban ym dei ban don mano mano ruh na ki nongshongshnong ki ban mad ia ka jingkyrduh bam, ong u Chairman jongka Meghalaya State Food Commission Bah DP Wahlang haba pyntip “la ai bor ia ka Commission ban pynthikna ba ym dei ban don uwei ruh u briew hapoh ka jylla ban shah thngan”.
U Bah Wahlang ula pynpaw ia kane haba kren ha ka jingialang jongka ‘Regional Camp 2026’ kaba la pynlong ha Rongjeng, East Garo Hills District ha ka 15 tarik u Jymmang. Ia kane ka Camp la pynlong da ka Sub Division Office (Civil), Rongjeng Sub Division, ryngkat ka jingiatreilang bad ka Meghalaya State Food Commission, da ka jingthmu ban kyntiew ia ka jingshngain ha ka jingioh ia ka bam.
Haba ai jingkren, u Bah Wahlang ula “banjur ia ka bynta jong ka Meghalaya State Food Commission ha kaban khmih ia ka jingpyntreikam ia ka Food Security Schemes ha ki tnad bapher bapher”.
Ula ong, ba kane ka kynthup ia ka Tnad Food & Civil Supplies kaba pyniaid ia ka Public Distribution System (PDS), ka tnad pule puthi kaba khmih ia ka PM POSHAN scheme bad ka tnad Social Welfare Department kaba kitkhlieh ia ki Anganwadi Centres.
“Ka kamram jong ka State Food Commission ka long ban pynthikna ba ym dei ban don mano mano ruh hapoh ka jylla kin mad ia ka jingshah thngan ne ban ym ioh ia ka bam” la ong u Bah Wahlang.
Halor ka jingshimkhia ia ki jingeh, ula pynshlur ia ki nongioh jingmyntoi ba kidei ban leit sha ka Meghalaya State Food Commission, lada ka jingeh ka jongki kadei kaba iadei bad ka Food Security Schemes ia kaba ym shim la lah ban pynbeit ha ki kyrdan bapher bapher.
Ula pynthikna ba “Ka Commission kala pynkhreh ia ki sienjam ban tuklar bad ban pynthikna ba kino kino kiba ioh jingmyntoi kim dei satia ban shah ieh khlem ka jingioh ia ka bam”.
Ha kane ka jingialang la wan ban iashimbynta da u Dr M Tyngkan dkhot jongka Commission, Deputy Commissioner, East Garo Hills District, ki heh ophisar sorkar bad u Bah IW Ingty uba long u Member Secretary.
Ki ophisar na ka tnad Social Welfare kila pyni ia ka jingtreikam jongka ICDS, katba ka tnad pule puthi kala ai jingbatai halor ka PM POSHAN.
Ka Dina Sangma, ADC jongka East Garo Hills District, kala kren halor ka Public Distribution System, katba kiwei pat ki ophisar kila kren halor ka Food Security Act, kum ka sienjam kaba kongsan ban iai neh bad ban kynjoh ia ka thong ba yn nym don mano mano ruh ban iap thngan.
Ia kane ka Regional Camp 2026 la pynlong hapoh jong ka mat “National Food Security Act, 2013.”
