Shillong, Nailur 27 : Ka Shnong Kongthong, East Khasi Hills District, ka Shnong kaba la pawnam ha satlak ka pyrthei kum ka Shnong ba khot Iawbei da ki jingkynud sur iala ki khun ki kti sha lum sha wah, kala ioh ia ka khusnam kum ka “Best Tourism Village 2023” ha ka National Tourism Award bala ai da ka Ministry of Tourism, ka Sorkar India.
Kane ka jingialang sam khusnam kala long ha ka Sngi Balang ha Bharat Mandapam, Pragati Maidan, New Delhi.
Ia kane ka khusnam la aiti sha ka Shnong Kongthong da u V Vidyavathi, IAS, uba dei u Secretary ka Ministry of Tourism, ka Sorkar India haba ai ka jingithuh ia ka jingpyrshang ba radbah jong ka Shnong ban kyntiew ia ki kam jngohkai bad ban pynneh pynsah ia ka riti dustur u u menbarim.
Ka Shnong Kongthong kaba don ha ka thain Khat-ar Shnong ka dei kaba la tip ruh kum ka ‘Whistling Village ka Ri India’.
Ha ka juk kaba ki briew ki ju iakren iakhana lyngba ki mobile phone, ki video chat bad ki text message, ki nongshong shnong ka Kongthong pat ki pyndonkam da ki sur khot iawbei ba shu kynud sur jingrwai, ban iakhot hapdeng jong ki sha lum sha wah.
Kane ka dei ka rukom ba kila leh naduh hyndai hynthai kaba la pynlong ruh ia kane ka Shnong ban pawnam ha satlak ka pyrthei.
