Shillong, Risaw 4: Ka Meghalaya kala jop ia ka jingiakhun balai jong ka Women’s U-19 T20 Trophy da 50 runs pyrshah ia ka Sikkim ha ka jingiakhun hynne ka sngi ba-ar ha Hyderabad bad ka jingiaroh kala leit sha ka Awesa G Momin kaba la ioh ban shim haduh 4 wicket.
Haba jied ban tied nyngkong hadien ba jop ia ka jingkynting pisa, ka Meghalaya kala lah ban kamai haduh 87 runs bad hap 9 wicket ha ka 20 over shuwa ban bol ia ka Sikkim tang 37 runs bad pynhap ia baroh ki wicket ha ka 18.1 over.
Ka Awesa kala shim haduh 4 wicket bad ai tang 1 runs ha ka 2.1 over bad kine ki wicket ki kynthup ia ka captain jon ka Sikkim ka Dikha kaba lah ban kamai 11 runs.
Kiwei pat ki nongkawang bol kiba la ioh shim wicket ki dei ka Neelam Roy kaba la shim 2 wicket bad ai tang 3 runs, ka samla Daffica Kharbani kaba shim shi wicket bad ai 5 runs, ka samla Sistilin Ryntathiang kaba shim shi wicket bad ai tang 9 runs lem bad ka Ankita Sharma kaba shim 1 wicket bad ai tang 11 runs.
Shuwa kane, ka Sharma kala lah ban kamai ryns haduh 32 run n aka 37 bol shuwa ba kan out ha ka over ba khatduh.
Ka Meghalaya mynta kan ioh shongthait shisngi shuwa ba kan iakhun pyrshah ia ka Karnataka ha ka sngi Palei.
