Shillong, Naitung 20 : Ki Nongkyrshan ka Garo State Movement Committee (GSMC) bad ka ACHIK, kila pynlong ia ka jing iaid rally da ka thuk thuk hynne ka janmiet sngi Palei ha Tura, ban pynpaw ia ka jingpyrshah kaba jur halor ka jingkynthoh jong ka Myntri bad Nongaiktien ka Sorkar Kong Ampareen Lyngdoh pyrshah ia ka jingdawa Winter Capital ha Tura.
Ka Myntri ka la poi sha Ri-Lum Garo hynne ka sngi ban leit jurip jurip ia ka rukom treikam jong ka Tnad ba ka khmih bad ruh ban lum ia ka jingialang bishar kam bad ki Heh Ophisar.
Ka Myntri kala poi ha Resubelpara, North Garo Hills hynne ka sngi Palei bad kan poi sha Tura mynta ka miet na ka bynta ban iashimbynta ha ka jingialang bishar kam bad ki heh Ophisar ha Tura Circuit House lashai ka sngi Thohdieng shuwa ba kan mih ban leit sha South Garo Hills.
Ka GSMC bad ka ACHIK kila pyrshah jur ia kane ka jingwan iuhkjat ka Myntri halor ka nongrim ba ka pyrshah ia ka jingdawa Winter Capital ha Tura, da kaba ong ba ka jingdawa ia ka Tura kum ka Nongbah ba-ar jong ka Jylla kam dei satia ia kaban pynsngap.
“Kum ia kine ki jingdawa ym dei ban pynsngap, kane ka dei ka jingsngew jong nga shimet, namar ngin sa buh ialade ha ka jingeh lada man ki District ki wanrah iala ki jong ki jingdawa. Kan long kaba eh ruh ia ngi ban pyniaid ia ki kam ki jam” ong ka Kong Ampareen haba iakren bad ki lad pathai khubor ha ka sngi Ba-ar.
Ka jingdawa Winter Capital ka dei ka jingdawa kaba la slem jong ki paidbah ka ri-lum Garo namar ka jingjngai ka jaka bad ka lah ban kyntiew ha ka ioh ka kot. Hynrei ka jingkren ka Myntri kala pynkha ia ki jingpynrem na ki kynhun bapher bapher kiba ngeit ba ka Tura ka don hok ban ioh jingithuh kumka nongbah Ba-ar ka Jylla.
Wat hapdeng kane ka jingiapyrshah, ka Myntri kala kut jingmut ban leit iuhkjat beit sha South Garo Hills bad ban leh eiei halor ka jingsngew jong ki trai shnong.
