Shillong, Lber 06 : U Myntri Rangbah ka Jylla Conrad K Sangma ha ka sngi Palei ula kular ban thaw da ka Committee ka ban shong bishar ia ka jingdawa ban wanrah ia ka Winter Capital ha Tura, West Garo Hills.
Kane ka jingkular kala pynlong ruh ia u Nongialam ka Liang Pyrshah Mukul Sangma ha kaban mynjur ban weng noh ia ka resolution bala wanrah halor kane ka kam hapoh ka Iingdorbar.
“Kumba ju pyniaid ia ki kam bala pyntreikam hapoh ka Iingdorbar, Nga kyntu ia u Nongialam ka Liang Pyrshah ban weng noh ia ka resolution namar ym pat ju don ka Sorkar ban mynjur ia ka resolution ba wanrah da ka Liang Pyrshah. Ka dei ka kam kaba eh hynrei namar ka resolution to ngin iakynduh bad iashong bishar ban lah pynurlong ia kane” ong u Conrad haba jubab ia ka resolution.
“Namar ba ngim lah ban iaid lang bad ka resolution, Nga lah ban buh noh da ka Committee ki Party. To ngin iasyllok bad baroh ki kynhun na Ri-lum Khasi, Jaintia bad Garo, ki mat bapher bapher bad kiei ki jingeh kiba don” ula pynbna.
Haba pynpaw ba ki kam ka Sorkar ki kren kham jam ha kaban pynurlong ia ka jingangnud u paidbah, u Conrad ula ong “Baroh ki kam bala leh ki dei ki nuksa ban phiah ia ka bor treikam bad wanrah ia ka synshar khadar shajan jong u paidbah. Namar kata, ngin iaid kat kum ka jingmut jong ka resolution bad ngin sa thaw ia ka committee halor kane. Da kane, nga kyrpad ia u nongwanrah ia ka mat ban weng noh ia ka resolution”.
U Conrad ula ong ba ki dkhot jong ka Liang Synshar kin ym lah ban kyrshan ia ka resolution namar ki katto katne ki daw bad ka jinshisha ka long ba ha kine ki 53 snem ym pat ju don ka resolution ba wanrah da ka Liang Pyrshah ban mynjur hapoh ka Iingdorbar hynrei kam mut pat ba ym iasngewthuh ia ka jingkongsan jong ka kam.
“Haba ong ia kane, kane ka kam jong ka Winter Capital ka dei kaei kaei kaba ngi la don jingsngew bad bun ki kynhun kila wan iakynduh ia nga. Nga la iakynduh ia jan baroh ki kynhun kiba la wan ban iakren ia kane ka kam” ula ong.
U Conrad ula ong ba ka Sorkar kala leit pynlong ia ki jingialang jong ka Kynhun Myntri sha kylla ki jaka jong ka Jylla-Tura, Jowai, Sohra, Resubelpara haba ban jur ba “ kum kine ki prokram ym lah ban shu khein ia ka jingpynlut. Lada phi phaikhmat sha kane tang hangta ngin duh noh ia ka jingmut ban rah ia ka kynhun Myntri sha u paidbah”.
“Dei namar kane ka daw ba ngi la leh ia kan. Ka jinglut ka don khlem pep hynrei ka khubor ba pyniadonbynta ia baroh ka long ban pyni ba baroh ki nongshongshnong ha ka imlang sahlang jong ngi ki long kiba kongsan ia ngi. Kumta, ka Cabinet on the Move kan nang iai bteng” ula ong.
Nalor kane, u Myntri Rangbah ula pyntip ruh ba naduh u 2018, ka Sorkar kala sdang ban buh ia ki Myntri Sorkar ba dei khmih ia ki District bapher bapher ba kin leit iuhkjat sha ki shnong ki thaw bad pynlut ia ka por ban sngewthuh ia ki jingeh ba ki iakynduh.
“Shibun ki kam ngi la lah ban pyni ia ka jingmut ba shisha jong kane ka Sorkar bad ban pynthikna ba ngin pynpoi ia ki kam pynroi ha baroh ki liang sha baroh ki thain ka Jylla” ula ong.
Kum shibynta na kane ka jingangnud, u Myntri Rangbah ula pynbna ruh ia ka rai jong ka Sorkar ban pynlut haduh T.100 klur na ka bynta ban tei ia ka Integrated Administrative Complex ha Tura, West Garo Hlls.
“Haba nyngkong ngi mut ban shna da ka Ophis kaba rit hynrei lada phi peit ia ka jingpynwandur ia ka complex, ki don ki kamra ia u CM, ki Myntri, ka kamra shong jingialang ka Kynhun Myntri, u Chief Secretary. Balei ngi leh ia kane? Kane ka dei ka kam ba ngi leh ban rah shajan ia ka synshar khadar sha u paidbah” ula ong.
Nalor ka Tura, u Conrad ula ong ba ia ka Integrated Administrative Complex yn sa shna ruh ha Jowai, West Jaintia Hills bad ha Pynursla, East Khasi Hills.
Nalor kane, u Conrad u iathuh ba ka Sorkar jong u kala pynthikna ba ka jingtei ia ka Raj Bhavan ha Tura kan dep bad la lah ban plie ia ka da ka President ka Ri India haba bynrap “Kam dei satia tang ka jingpyndep ia ka Raj Bhavan hynrei sngewthuh hi ka mut aiu. Ka dei ka dak jong ka jingiadon bynta bad pynlong ia ki paidbah ba kin sngew ba ngi la khein kongsan ia ki”.
Nalor kane, u Myntri Rangbah ula kam ba ha ka sien ba nyngkong eh, baroh ki C&RD Block ha ka Jylla kila ioh ia ka Building ba thymmai.
“Baroh ki Block ba dang pynkha thymmai, ngi la mang ban tei ia ki building mynta u snem” ula pynbna.
Ula pyntip ruh ba ka Sorkar kala pynthikna ia ka jingtei noh ia ka Ophis u DC ha South Garo Hills, kaba la treikam mynta la 35 snem na ka Ophis barim u SDO.
