Nongstoin, Nohprah 08: U Phadar Anselm Nonglang, Parish Priest ka St.Dominic Savio Parish, Kynshi u la pyntip paidbah ba ka Proseshon Bah Ïukharis jong ka Nongstoiñ Jylla niam mynta ka kynti kan long ha Madan Kynshi Them, Eastern West Khasi Hills District kata ha ka 10 tarik u Nohprah 2023.
U la kyrpad ïa ki riewngeit kiba wan sha katei ka Proseshon Bah jong ka Nongstoiñ Diocese ïa kiba na ki thaiñ Nongstoiñ ter ter ba kin pynsangeh ïa ki Kali jong ki ha lad Myrïaw ha ki madan kiba don ha kner surok, kiba wan na ki thaiñ Lawbyrtun ter ter kin pynsangeh ha Lawkseh sha shilliang jingkieng heh, katba kiba wan na ki thaiñ Mairang Shillong kin pynsangeh shuwa ban poi sha ka jingkieng heh, katba ïa kiba don Carpass yn shah haduh jan madan.
Ha kajuh ka por u la kyrpad ruh ïa ki briew kiba kwah ban leit die kino kino ki jingdie dukan la ka long ka bam ka dih ne ki tiar ki tar wat ïa kiba leit die Rossary ne ki Kotbah Baibel yn ym shah satia, laitnoh tang ïa kito kiba la ïaid lyngba ka jingpynïaid jong ka balang bad la ong ruh ba la leh ïa kata khnang ban lait na ki jaboh jabaiñ kiba long ka daw ban pynjakhlia ïa ka Mei-Mariang.
U Parish Priest u la wer sngewbha ïa baroh kiba kwah ban leit sha katei ka Proseshon ba kin leh adkar khnang ban lait na kino kino ki jingsngewsih.
