Shillong, Nohprah 01 : U Myntri Rangbah ka Jylla Conrad K Sangma ula ban jur ba ka jingpyniaid shakhmat ia ka Organic Mission ne ka thong ban pynmih marrep ba khlem khleh dawai, ka donkam ia ka jingiatreilang na baroh ki kynhun kiba iadonbynta ha ka kam rep.
“Ka thong jong ngi hi ka long ban kyntiew ia ki nongrep ka Jylla jong ngi bad ka thain. Nga kyntu ia baroh ki kynhun ba don bynta ym ban shim ia kane tang kum ka jingkut ka jingialang, hynrei kum ka jingsdang ia ka lynti iaid kaba jngai. Ha ngi, ki nongrep kin iai don hapdeng eh ha ka jingthaw ia ki policy bad man ki prokram la buh da ka thong bad ka por ban pyndep” ula ong.
U Conrad ula pynpaw ia kane haba ai jingkren ha ka sngi kut jong ka 1st Northeast India Organic Week bad ka 4th IFOAM World Organic Youth Summit ba long ha Shillong hynne ka sngi Nyngkong. Kine ki prokram ka dei ka jingpynkut ia ka jingialang ba saw sngi jong ki nongkhaii, ki stad rep khlem dawai, ki kynhun ki samla, ki kynhun ki nongrep bad ki kynhun bapher bapher kiba dei na ka thain bad kiba nabar ri ruh kumjuh.
U Myntri Rangbah ula ban jur ia ka jingiaid ka kam rep khlem dawai bad ka kolshor hangne ha Meghalaya bad ong “Ka kyntien rep khlem dawai, ka kham palat ia kaei kaba shu iakren. Ka don jingiadei bad ki nongrep jong ngi, ki longshuwa jong ngi, bad ka rukom rep jong ki briew jong ngi kaba la iaid da ki spah snem. Katba ka pyrthei ka ang jam sha ki teknologi ba tymmai, ki rukom rep tynrai jong ngi ki dang iai neh kumjuh-kaba mynta ka ieng kum ka jingkyrkhu ba wan na shalyndet. Ka thain Shatei Lam Mihngi baroh kawei ka don ia ka jingnang jingtip kaba bun kyrhai ba kumno ngin lah ban iasam mynta bad ka pyrthei”.
U Myntri Rangbah ula pynbna ruh ia ka jingkut jingmut jong ka Jylla ban nang pyniar iaka rukom rep ba khlem khleh dawai. “Ngin dang pynmih ia ka thong hynrei kaba lah ban kynjoh ha kaban pyniar ia ka kam rep khlem khleh dawai ha kylleng ki jaka rep hapoh ka Jylla. Kane kan dei ka jingsdang kaba rit hynrei kan kyrshan shibun ia ki nongrep bad kan ktah bha ia ka imlang sahlang”.
Kiwei pat kiba la ai jingkren ki kynthup ia ka Vinita Sudhanshu, General Manager, APEDA, ka Jennifer Chang, Executive Director, IFOAM Asia, ka kong Isawanda Laloo, Secretary, Agriculture and Farmers’ Welfare, bad kiwei kiwei.
