Shillong, Nailar 20: Ka All Meghalaya SSA Non Teaching Staff’ Association (AMSSANTSA) ha ka sngi Ba-ar, ka la pynsangeh noh ia ka jingiakhih shongkyllain myngor khlem por, kaba la iaid la 21 sngi, hadien ba ka sorkar jylla ka la mynjur ban pynbeit ryntih bad ban pynkiew noh ia ka tulop jong ki. La pynbeit ba kane ka jingsiew thymmai kan treikam naduh ka 1 tarik u Iaiong, 2024.
Ïa kane ka jingmynjur la rai hadien ka jingïalang jong ka Rationalization Committee ba la pyniaid da u Commissioner & Secretary ka Education u Vijay Mantri, kaba la long ha ka 19 tarik u Nailar.
Ka sorkar jylla ka la mynjur ia ka jingai jingmut jong ka Committee ba ka base pay ba thymmai kan sdang treikam noh naduh ka 1 tarik u Iaiong, 2024, ong u Mantri ha ka sngi thohdieng.
“Baroh ki nongtrei kiba la don lypa, la pyrkhat ban pynkiew da 2% ka seniority allowance man ka snem jong ka jingshakri ba la ai naduh ka 1 tarik u Iaiong, 2024,” u la ong.
Ka komiti ka la ai jingmut ruh ba ia ka jingtip kaba don jong baroh ki nongtrei dei ban pynshisha bha na ki ophis jong ka District shwa ban phah ia ka jingtyrwa kaba khatduh.
Ia kito ki Nongtrei kiba khlem pat kynthup ruh dei ban shim jingkhein lang noh hashuwa ban buh ia ka jingtyrwa kaba khatduh sha ka Tnad.
Ka sorkar jylla ka la bthah ruh ïa u State Project Director, ka SSA ban pyrkhat ïa ka jingai jingmut jong ka Committee ba “dei ban pyrkhat ïa ka jingpynkiew tulop kaba 5 percent man la u snem ha ka bainong ba la ai man la u snem kaba sdang naduh u snem 2025-26.”
Ka la ong ba ia ka base pay ba la buh naduh ka 1 tarik u Iaiong, 2024 dei ban bishar biang hadien ba la dep 5 snem.
La bthah ruh ia ka SPD, ka SSA ban wad ia ka lad ban pynrung kyrteng ia ki nongtrei Non Teaching Staff ka SSA ha ka EPFO na ka bynta ka Provident Fund nalor ban pynrung ia kine ki Nongtrei ha ka Meghalaya Health Insurance Scheme (MHIS).
Haba pdiang sngewbha ïa kane ka rai jong ka sorkar, ka President jong ka AMSSANTSA Jennyfer Synrem ka la ong, “Ngi la rai ban weng noh ïa ka jingïashong kyllain mungot khlem pud por jong ngi hadien ba ngi la lah ban pynurlong ïa ki jingdawa kiba kynthup ïa ka 2% ka seniority allowance bad 5% ka jingpynkiew tulop ba manla ka snem. Watla, ngim pat ïoh 80 % ka jingpynkiew tulop hynrei ngi sngewhun haba ngi peit ia ka jingshisha ba ka sorkar ka la rai ban pynbeit ia ka rukom treikam.”
“Ka jingthaw ia ka Rationalization Committee, ha kaba ngi ruh ngi long ki dkhot jong ka, ka la leh shibun kiei kiei halor ka jingiapher ka jingsiew. Mynta ngi la ioh ia ka tulop kaba iapher kaba shong kat kum ka jingtrei slem ia ka kam ym kumba long ha ki por mynshuwa ha kaba u nongtrei ba dang rung thymmai un shim ia kajuh ka tulop kum kito kiba la trei la 18 snem,” ka la ong.
Haba kylli, ka kong Synrem ka la ong, “Ngi sngewkmen ba ia kane ka jingsiew thymmai yn pyntreikam noh naduh ka 1tarik Iaiong, 2024. Ngi la ai khublei ia ka sorkar hapoh ka jingialam u Myntri Rangbah ka jylla u Conrad K Sangma uba la pynbeit ia ki jingeh jong ngi lyngba ka Committee.”
“Kham mynshwa, ngi la kyntait ia ka rai jong ka sorkar ban ai 25% ia ka jingpynkiew tulop namar jan mar shiteng na ki bym dei ki nonghikai, kim shym la shah kynthup hapoh ka jingtyrwa bad kam long kaba shonghok namar ba kam don kano kano ka jingpynkiew tulop ha kine ki 8 snem ba la dep,” ka la ong.
“Halor ka rai jong ka sorkar ban weng ïa ki jingeh jong ngi, ngim donkam shuh ban mih sha surok ban ïakhih,” ka la bynrap.
 ha ka sngi Balang, ka la pynsangeh noh ia ka jingiakhih shongkyllain myngor khlem por, kaba la iaid la 21 sngi, hadien ba ka sorkar jylla ka la mynjur ban pynbeit ryntih bad ban pynkiew noh ia ka tulop jong ki. La pynbeit ba kane ka jingsiew thymmai kan treikam naduh ka 1 tarik u Iaiong, 2024.){kind=link}