Shillong, Risaw 21 : Ka All Meghalaya Sarva Shiksha Abhiyan School Teachers’ Association (AMSSASTA) ha ka sngi Nyngkong, kala rai ban weng noh shuwa shipor ia ka jingiakhih da kaba shong kyllain mungor ha madan Malki hadien ka jingkular jong ka Sorkar ban sa pynkiew noh ia ka tulop.
Ki Nonghikai SSA (AMSSASTA) kila shong kyllain mungor ha madan Malki naduh ka 1 tarik Risaw, kaba la kynjoh 21 sngi hynne ka sngi, ban pynbor ia ka Sorkar Jylla ba kan pynkiew noh ia ka tulop jong ki 13000 ngut ki nonghikai SSA da 100%.
Ia kane la pynbna da u President ka AMSSASTA Bah Peter Thyrniang hadien ka jingiakynduh iaka Myntri Sorkar kaba dei ruh ka Nongaiktien ka Sorkar MDA, Kong Ampareen Lyngdoh.
Haba kren shaki lad pathai khubor, u Bah Peter u la ong ba ka daw ba la rai ban weng noh iaka jingiakhih kadei hadien ba ka Myntri Sorkar Kong Ampareen Lyngdoh kala pyntip shaka Association ba ka Sorkar kala mynjur iaka jingdawa jong ki Nonghikai SSA bad kan sa shim rai ha kine ki khyndiat bnai ban wan.
Hynrei ula ong ba ka Myntri kala pyntip ba ka Sorkar kam pat lah ban pynbna ia kane ka jingpynkiew tulop namar ka jingtreikam ka Model Code of Conduct (MCC) jong ka elekshon shiteng samoi ha Gambegre constituency.
Ula iathuh ba ka Myntri kala kren shai ba ka Sorkar kam pat lah ban pyntip haduh katno kan kyntiew ia ka tulop bad lano yn kyntiew.
Lah ban kdew hangne ba ka sorkar jylla kan donkam ban pynlut sa kumba T.300 Klur na ka bynta ban pynkiew ia ka tulop jong ki nonghikai SSA. Kane ka long kat kum ka jingai jingkhein jong ka Tnad Pule Puthi ka Jylla.
Haba kylli, u nongialam ka AMSSASTA ula ong, “Ka Association ka ieng skhem halor ka jingdawa ban pynkiew ia ka tulop da 100 % haba buh hakhmat ba ka jingpynkiew tulop ba khatduh ka dei phra snem mysnhuwa, kata ha u snem 2016″.
Kat kum ka jingong jong u, ki nonghikai skul Lower Primary kila ioh tulop mynta tang T.19,994 katba ki nonghikai UP kila ioh T.20,493.
Nalor kane, u President ka Association u pyntip ba ka seng kala rai ruh ban pynsangeh noh ia ka rally kaba thmu ban pynlong ha ka 23 tarik Risaw namar kane ka jingmih ba mynta.
 ha ka sngi Nyngkong, kala rai ban weng noh shuwa shipor ia ka jingiakhih da kaba shong kyllain mungor ha madan Malki hadien ka jingkular jong ka Sorkar ban sa pynkiew noh ia ka tulop.){kind=link}