Shillong, Nailur 15: Ka Voice of the People Party (VPP) kaba don ha ka Liang Pyrshah, hynne ka sngi Thohdieng kala weng noh ia ka amendment motion halor ka jingbuhpor jong ka Business Advisory Committee (BAC) na ka bynta kane ka Dorbar Synrai ka Iingdorbar Thaw Ain ka Jylla hadien b aka Sorkar kala kular ban pynjlan ia ka jingshong dorbar da 2-3 kynta manla ka sngi.
Haba wanrah ia kane ka motion, u MLA ka North Shillong Bah Adelbert Nongrum ula pynpaw ba um sngewtynnad satia halor ka jingiohi ia ka calendar namar ka jingbuhpor tang 5 sngi ka lyngkot palat khamtam haba ka Sorkar ka pynlong ia ka Dorbar tang arsien shisnem.
“Bad ka jingai tang 2 sngi ia ki private member business kam pat biang satia, haba ki don shibun ki ishu kiba donkam kiba ktah ia ka Jylla” ula bynrap.
Ula ong ba ki don shibun ki ishu ba ktah ia ka Jylla kiba kynthup ia ka jingioh kyrdan ka Jylla ha ka National Index halor ka jingduk bad ka pule puthi kaba wan shatrai duh ha ka ri, ka jingjyllei u droks, ka jingeh ki samla pule halor ka National Education Policy (NEP), ka jingiam ki samla bala nang la stad kiba khlem kam, ka jingbym biang ha ka rukom ai bhah pule MBBS, ka jingkylla ka Parliament ia ka Forest Conservation Act bad kiwei kiwei.
“Da ka jingsngewkhia kaba jur, nga kylli, hato kala biang mo ba ia kine ki ishu ba kongsan kiba ktah beit beit ia u paidbah ka Jylla,yn iakren tang 5 sngi ba don ka Dorbar? Balei baa don kane ka jingpyrshang ban pynduna ia ka por long Dorbar? Kaei kaba don sha lyndet?..Ka Dorbar kaba lyngkot kam iapher bad ka jingpyniap ia ka riti synshar paidbah”.
Haba kyrshan ia ka motion, u President ka VPP bad MLA ka Nongkrem Bah Ardent M Basaiawmoit ula ong “Nga sngew ba kan long na ka bynta ka jingbha jong ki paidbah ka Jylla b aka jingiashong Dorbar ka dei ban pynjlan sa katto katne sngi bad pynbun kynta khnang ban lah iakren ia kiba bun ki ishu”.
Ula pynkynmaw ruh ia ka Sorkar ba ka Liang Pyrshah ka don ha kaban kynthoh ia ka Sorkar khnang ba kan tei bad ban lah pyntyllun shakhmat ia ka Jylla.
Haba jubab ia ka motion, u Symbud Myntri Rangbah ba khmih ia ka Tnad Parliamentary Affairs Bah Prestone Tynsong ula ong “Ha ka jingshisha, ha kato ka sngi ba shong ka BAC ia ka jingialang, ngi la dep ban iakren ia baroh ki jingdonkam bad baroh ki Dkhot bad ngi la buh ban long 5 sngi”.
“Hynrei, ha kane ka jingiashong dorbar ba 5 sngi, hapoh ka jingstad u Lamphang, ngi lah ban pynjlan ia ka kynta shong dorbar sha ka 2-3 kynta, lada donkam. Kumta, nga khein ba lada ngi pynjlan 2-3 kynta ha ka 5 sngi, kan long palat ne duna ia ka shisngi” ula bynrap.
Haba mynjur ba ki ishu bala pynsngew da ka Luang Pyrshah ki dei kiba kongsan, u Symbud Myntri Rangbah ula ong “Ka mat hangne hi ka long ba nga kwah ban kyrpad khamtam ia ka Liang Pyrshah, haba phi phah ia ki mat iakren, kan bha shibun lada phi lah ban iashonglang bad shim rai”.
U Bah Prestone ula ong ba ula ioh la ka dei ha ki jingkylli, motion, zero hour notice ne kiwei kiwie, ki ishu kim poi sha ka jingiakren bad ki dkhot ki ju phah ia kijuh ki mat ban iatai kaba shu pynsyrwa kai ia ka por.
Halor ka jingkular ban pynjlan ia ki kynta jong ka Dorbar, u Bah Nongrum ula mynjur ban weng noh ia ka motion of amendment.
 kaba don ha ka Liang Pyrshah, hynne ka sngi Thohdieng kala weng noh ia ka amendment motion halor ka jingbuhpor jong ka Business Advisory Committee (BAC) na ka bynta kane ka Dorbar Synrai ka Iingdorbar Thaw Ain ka Jylla hadien b aka Sorkar kala kular ban pynjlan ia ka jingshong dorbar da 2-3 kynta manla ka sngi.){kind=link}