Shillong, Nailar 03: Ka Khasi Student Union (KSU) Laban Circle hynne ka sngi Palei, kala byrngem ba lada ka tnat Forest kam weng noh shisyndon iaki jingtei beain ha Mahadev Khola, naka liang ka seng ruh kan wan ban tei da ki ïing ban ai sah iaki trai ri trai iaki longïing ba duk.
Ia kane la ong da u President ka KSU Laban Circle samla Ruben Najiar haba kren sha ki lad pathai khubor hadien ka jingwan jurip iaka Mahadev Khola ha ryngkat ka jingdonlang u bah S.M Lyngdoh u ba dei ruh u Range Officer ka tnat Forest lem bad ki bor Pulit.
U Samla Ruben ula iathuh ba kane ka jingwan jurip ka seng ia kane ka jaka kadei namar ba la sakhi ba bun kiba sah ha kane ka jaka kidei kiba sah beain bad kiba donkti ban pynjaboh iaka khlaw bad ki tyllong um ba pyndonkam da ka shnong Lawsohtun bad kiwei ki shnong markhap.
Ula iathuh ba haka jingshisha ka jingai jaka iaki riewngeit Hindu ha Mahadev Khola kadei thik tang ban tei iaka Mandir (ka jaka lehniam) hynrei kine ki riewngeit kila pynkhein iaka jingiateh daka ba tei ki ïing bad kiwei ki jait jingtei beain khlem da ioh kano kano ka jingbit naka tnat sorkar khamtam naka tnat Forest.
“Ka seng ka ioh jingtip ba haduh mynta ki don kumba 30-40 tylli ki longïing kiba la kam trai ia kane ka jaka bad nalor kata kine ki briew ki ju ai wai iaki bar jylla ban sah hangne daka bap hah siew T.100 haka shisngi bad namar ka jingsdang jyllei ki longing kane ka jaka ruh kala jaboh bha” la ong u samla Ruben.
U samla Ruben ula iathuh ba naka liang ka seng hashuwa ban wan jurip ia kane ka jaka kala leit buh ruh daka dorkhas ha u Principal CCF & HOFF ka tnat Forest & Environment ka sorkar jylla R. S. Gill ba dawa weng noh iaki briew kiba sah beain ha Mahadev Khola.
Ula iathuh ba ki briew kiba sah beain ha kane ka jaka kila pan jingbit ban pynkylla ia kane ka jaka kum ka jaka sah bad ban shna kum ki Guest House bad kiwei kiwei ki jingtei ban pyndonkam ma ki.
Haba iadei bad kane u Range Officer u bah S.M Lyngdoh ula ong ba naka liang ka ophis kan hap ban bishar iaki kot ki sla haba iadei bad kane ka jaka bad kan hap ruh ban pynbiang iaka kaiphod halor kane ka jingwan jurip ha ryngkat bad ka KSU.
“Ngi iaid katkum ki kyndon bad ngan hap ai iaka kaiphod sha u DFO bad naka liang u DFO ruh un sa phah iaka kaiphod sha kiba halor ban shim rai halor kane” la ong u bah Lyngdoh.
U bah Lyngdoh ula iathuh ba ka ophis kala ioh pdiang ruh iaka kaiphod ba ka don ka jingbret pathar iaki jaboh na kane ka jaka khamtam ha ka wah hynrei watla kata ruh ka ophis kan sa pynbiang iaka kaiphod kaba pura hapoh kane ka taiew hashuwa ban shim rai.
