Shillong, Rymphang 14 : U President ka NPP-Meghalaya bad Symbud Myntri Rangbah Bah Prestone Tynsong ula ong ba wat u briew ba hehspah duh hapoh ka Ri India, un ym lah ban thied jaka ha Meghalaya.
“Wat u Hehspah kum u Mukesh Ambani ruh un ym lah ban thied jaka ha Meghalaya namar ka jingdon jong ki Autonomous District Council (ADC) bad ka Mghalaya Land Transfer Act, kiba la thaw bad pynwandur da ki Longshuwa” ong u Bah Prestone haba kren ha ka rynsan ialap elekshon ha Nongshken ha ka sngi Palei ban pan jingkyrshan ia ka MDC kong Grace Mary Kharpuri.
“Namar kata, kam don daw ia ki paidbah ba kin sheptieng namar ngi don ia ki ADC bad ka Land Transfer Act” ula ong haba bynrap ‘Ka Land Act bala mynjur da ka KHADC ka dei kaba khlain bad ba treikam bha ban nang pynkhlain ia ka hok jong ki paid trai muluk halor ka khyndew ka shyiap”.
Ula pyntip ruh ba u Lat ka Jylla ula dep ban ai jingmynjur ia palat hynniew tylli ki bill bala mynjur da ka EC ba ialam ka NPP ha KHADC bad kane ka dei ka jingjop kaba khraw bha.
Halor ki jingkynnoh bamsap, u Bah Prestone ula ong “Ki paidbah kim dei ban ngeit ia kine ki jingkynnoh ba khlem nongrim namar ka Sorkar kam lah ban pynlut wat tang shi tyngka khlem da pynbiang ia ki jingkhein jingdiah. Ngi don ia ka kaiphod CAG, kaba lah ban phah ia ki riew bamsap wat sha along”.
Ula kyntu ia ki paidbah ba kin vote ia ka kong Grace ban pynthikna ia ka roi ka par ha baroh ki liang ha ka constituency.
