Shillong, Naitung 17 : U MLA ka Nongpoh bad Nongialam ka UDP Bah Mayralborn Syiem ula kyntu ia ki samla ba kin kiar ha ka ban pynlong ia ki surok paidbah ha Ri-Bhoi District kum ki jaka niah khyllah ia ki kali ne thuk thuk (stunt).
“Kum kine ki jingleh ym tang ba ki buh ia ka jingim jong phi ha ka jingma hynrei ka buh ruh iaka jingma ia ki nongleit nongwan” ula ong.
U Bah Mayral ula ong ba ka jingniah thuk thuk ba pynhers sted palat pud, khamtam ha ki sng kut taiew, kala pynkylla ia ki surok paidbah kum ki jana pynher kali, kaba buh shibun ki jingma ia ki nongleit nongwan. “Kane kam dei tang ka jing sngewkhia ia nga kum u MLA hynrei kum u nongshongshnong ka District. Ka jingshngain ki paidbah ka don ha ka jingma” ula ong.
Ka Nongpoh kala sakhi ia ka jingjur ki kam pynkhein ia ki kyndon niah kali, khamtam hapdeng ki samla, kynthup ki trai shnong bad kiba wan na Assam. U Bah Syiem ula pynpaw ba kumno ka sngi U Blei kala kylla long ka sngi pynkhein ain jong ki samla kiba la pynher ia ki thuk thuk bad scooter, bad leh ia ki stunts bapher bapher kaba ktah ia ki nongleit nongwan.
“Nga la iohi dalade ia kum kine ki jingjia la bunsien. Ka long kaba ima bad kaba pynthut iaka leit ka wan u paidbah” ong u Bah Syiem haba kyntu ia ki bor Sorkar ba kin shim ia ki sienjam ba kham tyngeh ban tehlakam.
Ula kyntu ruh ia ki Pulit bad ka tnad Transport ba kin leh eiei da kaba tyngeh pyrshah ia kino kino kiba pyndonkam ia ki surok paidbah ban leh stunt khlem ka peit nangno ki wan bad na kaei ka Jylla. “Ia ka jingniah kali khlem akor ym dei ban ailad satia. Ngi dei ban leh eiei shuwa ban dier ka por” ula ong.
.){kind=link}