Shillong, Nailar 09 : U Myntri Rangbah ka Jylla Conrad K Sangma, ha ka sngi Balang ula kyntu ia ki samla riewlum jong ka thain Shatei Lam Mihngi ba kin khmih palat ia ka Reservation Policy bad ban long kiba kot bor ban iakhun ha kaban iaknieh wan shakhmat (compete) bad ki samla ba kynsai ha ka pyrthei.
U Myntri Rangbah ula kren ia kane ha ka jingrakhe ia ka International Day jong ka World Indigenous People bala pyn long da ka North East Indigenous People’s Forum (NEIPF), Meghalaya Chapter ha Multi Conventional Hall, ha NEHu Campus, Shillong.
U Myntri Rangbah ula ong ba ka long kaba kongsan ban pynkylla ia ka jingmut jingpyrkhat jong ki briew khamtam jong ki paid riewlum ka Jylla bad ban sangeh noh ia ka jingkhmih lynti ba kan sa don ka jingbuh bhah kyrpang ha baroh ki kam ki kam.
“Ngin hap ban khmih palat ia ka reservation bad ka jingmut jingpyrkhat jong ki samla ka thain Shatei Lam Mihngi ka dei ban long ba ki dei ki ban kot bor ban iaknieh wan shakhmat (compete) bad kino kino ki samla ha ka pyrthei” ula ban jur.
U Conrad ula pyntip ba ki don shibun jait ki ishu jong ki paid riewlum ka thain Shatei Lam Mihngi kiba u sngewkhia shisha bad pyntip ba ki seng sain pyrthei bapher bapher lane ki kynhun seng bapher bapher lane ki Forum ki don ia kajuh ka thong haba phai sha ki paid riewlum “(Kane ka dei) ban iada iala ka snap kyrpang, iala ka tynrai bad ia kaei kaba ngi dei kaba pyniapher ia ngi bad kiwei pat ki jaidbynriew nalor ban sngew sarong iala ka snap lajong”.
Hynrei ula maham pat da kaba ong ba ka biang eh ban don ia ka snap kyrpang bad ban sngew sarong ia ka, hynrei ym dei pat ban shu khein sting ia kiei kiei baroh.
U Myntri Rangbah ula kyntu ia ka NEIPF ban ialeh ha kaban buh jingthoh noh halor ki snap kyrpang jong ki paid riewlum bapher bapher ka thain Shatei Lam Mihngi. “Ka Sorkar Meghalaya kala iatreilang bad ki lai tylli ki Autonomous District Council (ADC) ban buh jingthoh noh ia baroh ki riti dustur bad deity tynrai jong ki paid riewlum ka Jylla” ula pyntip.
Ula pynpaw ruh ba ki Jylla bapher bapher jong ka thain Shatei Lam Mihngi namar ka jingdon bun ki Jaidbynriew ha ka, kila mad ia ki jingeh ba bun rukom bad ka dei lyngba ki prokram bad ki forum ba kum kine ba ka thain ka lah ban ieng rasong halor kine ki jingeh bad ba lah ban pynlong ia ka kum ka thain kaba khlain.
“Nga pang mynsiem ban iohi ia ka jingjia ha Manipur bad nga kyrmen b aka forum kum ka NEIPF kan shimkhia ia kane ka kam ha kaban lah wanrah pat ia ka jingsuk ha Manipur khnang ba ngin lah ban jam shakhmat bad ioh iarap ia ki jaidbynriew bapher bapher ha kane ka Jylla” ula ong.
U Conrad ula ai jingmut ruh ba ka Forum kum ka NEIPF nalor ka jingshimkhia ia ki ishu bapher bapher jong ki paid riewlum, ka dei ruh ban wad jingtip, wad bniah bad buh jingthoh ia ki jingnang jingtip bad ki jingleh tynrai (knowledge & Practice) jong ki paid riewlum kaba don shibun ban tyrwa sha ka pyrthei.
“Ia kane ka spah jingnang jingtip dei ban ai pateng sha ki samla jong ka pateng bad ban sam ruh bad ka pyrthei baroh kawei” ula ong.
Shuwa kane, u Myntri Rangbah ula pyllait ruh ia ka kot “Indigenous 2023” ha kane ka prokram. Ki kynhun bapher bapher na ki Jylla ka thain Shatei Lam Mihngit kila wan iashimbynta ha kane ka jingrakhe.
