Shillong, Iaiong 19: U Symbud Myntri Rangbah ka jylla Bah Sniawbhalang Dhar ula ong, “Wat khuslai ka sorkar jylla kan sa pyrkhat bha ha kaba iadei bad ka Reservation Policy”.
Haba kylli la u kyrshan ne u pyrshah iaka jingdawa ba dei ban pynkylla thymmai noh iaka Reservation Policy, u Bah Sniawbhalang uba long ruh u nongialam ka NPP, ula ong, “Ka jingkylli la u kyrshan ne ym kyrshan kam mih satia, namar ka sorkar kan hap ban sngap ia uba bun balang bad ka sorkar synroplang kan sa lum iaka jingialang jongka kynhun Meghalaya Democratic Alliance (MDA) bad u Myntri Rangbah ka jylla yn sa shimkhia halor kane bad u lah ruh ban lum ia ka jingialang bad baroh ki seng saiñ pyrthei”.
Haba kylli kum u Nongialam na rilum Jaintia u sngew kumno halor kane ka jingdawa, u Bah Sniawbhalang ula ong, “Ngi dei ki nongialam jong ka Jylla baroh kawei bad nga dei u Symbud Myntri Rangbah ka jylla um tang jong ki paid ka rilum Jaintia hynrei ia baroh kumjuh la kidei na Jaintia, Khasi ne Garo namar ngi don hangne ban shakri ia u paidbah”.
Haba kylli la ka seng NPP ka don jingthmu ban khroh ia u MP ka Lok Sabha u Bah Vincent Pala ban iakhun iaka elekshon MP ban wan na ka seng NPP, u Bah Sniawbhalang ula ong, “Ka dang don ka por sa shi snem ban long ka elekshon MP, balei phi kyrkieh ban tip noh, ka por kan sa batai kaba ka parti kan sa shim ia ka rai mano ban long u kyrtong ha katei ka elekshon”.
Haba kylli la kadei ka jingshisha ba lyngba ka jingshimkhia ka jongu ba kila pyrshang ban khring ai ki MLA ka PDF ban pyniasoh noh bad ka NPP, u Bah Sniawbhalang ula ong, “Kadei ka jingshimkhia jongka seng lada ka don kum katei namar nga ruh ngam don jingtip eiei.
Haba kylli lano kitei ki MLA kin pyniasoh noh bad ka NPP, u Symbud Myntri Rangbah ula ong, kan bha lada kylli hi na ki, namar lada phi kylli ia nga, nga te nga kwah ba kin wan ban pyniasoh noh mynta ka sngi hi.
Ula ong ruh, ba ka NPP kam shym la kren eiei ia ki MLA ka HSPDP ba kin wan pyniasoh noh bad ka NPP hynrei lada ki MLA ki kwah ban wan pyniasoh hi, ka seng ka long kaba kloi ban pdiang ia ki.
Haba kylli lada don kiba wan ban pyniasoh noh bad ka NPP, hato kin don kino kino ki seng sain pyrthei kiban hap iehnoh iaka shuki Myntri ka jongki, u Symbud Myntri Rangbah ula jubab da kaba ong, “Em, kiei kiei baroh kin neh beit kumba ki long, ka MDA –II ka long kaba khlain bha wat nym khuslai”.
