Shillong, Lber 27 : U Myntri Rangbah ka Jylla Conrad K Sangma hynne ka sngi Nyngkong, ula ong ba kam don eiei ban sheptieng ia ka jingshim ram namar ka dei shibynta na ka jingpynlut pynsep jong ka Sorkar Jylla.
“Baroh ki Sorkar ki shim ram hynrei ka Sorkar India kala buh da u pud ia ka song pisa jong ka ram..ta ka daw kam don eiei ban khuslai. Ngi la pynlut kat kum ka rukom kaba dei” ong u Conrad haba jubab ia ka jingiatai halor ka mang tyngka.
Ula ong ruh ba ka sorkar kala pynkha ia ka consolidation sinking fund kum ka jingpynap lada jia ryngkat ba ym lah ban siew ia ka ram bad ia ka sut.
Haba pynpaw ba ka Sorkar ka pyrrkhing bha ia kane, u Conrad ula ong ba ym don kawei ruh ka Jylla kaba la shah ba kan shim ram palat ia u pud. Ula pyntip ba 90% n aka ram ka dei kaba la siew da ka Sorkar India bad tang 10% ka dei kaba siew da ka Sorkar Jylla.
“Ka long kum ka grant. Namar kata kan dei ka jingduhnong ia nga ban nym shim ia ka kabu ia kane namar 90% n aka ram ka dei kaba siew daka Sorkar Pdeng. Kane ka dei kaei kaei kaba ym dei ban iakhuslai namar ka rukom treikam ba pyrrkhing kala don lypa” ong u Myntri Rangbah.
Halor ka jingkynnoh ba ka Meghalaya ka wan nyngkong eh na ki Jylla ba bamsap, u Conrad ula ong ba kane ka jingkynthoh kala mih ha ka por elekshon na ki katto katne ki briew, kiba la wan iashimbynta ruh ha ka jingpynsmai ia kane ka Sorkar….kine ki dei tang ki jingkynnoh elekshon.
Ula ong ba don ka por ba ka Sorkar Congress ka synshar ha Delhi, kila mih ki jingkynnoh pyrshah ia ki kum ka jingthied ia ka vote da ka pise, ka jyrsieh helipcopter, jyrsieh 2G bad kiwei kiwei bad ki jingkynnoh hi kin don beit.
“Hynrei, lada phi leit sha ki Iew ki hat, ia ka Meghalaya la tip namar ka Meghalayan Age, la tip ia nga namar u shynrai Lakadong, Rock Capital, Jingkieng Jri….” Ong u Myntri rangbah haba kyntu ia ki Dkhot ba kin nym pynmih ia ki jingkynthoh ba long pyrshah dalade ialade.
“Ngi don ia ka plan kaba biang bha bad ai ba ngin nym long ki briew kiba pyrshang ban pynthohbria ialade. Katba ka pyrthei ka dang ithuh ia ka kam IT, ka Ri ka ai khusnam namar ka kam jngohkai, ka Immunization program, JJM….ka Meghalaya kala nang kylla bad ki paidbah ki sngewthuh ia kane” ula bynrap.
Haba pynpaw ba ka Sorkar kala buh ia ka thong ban kynnoh ia ka ioh ka kot ba 10 billion bad aikam ia 5 lak ngut ha kine ki san snem ban wan, u Myntri Rangbah ula ong ba haduh 45,000 tylli ki kam yn pynmih na ka kam jngohkai, 50,000 na ka IT, 10,000 na ka kam Sorkar bad ki shnat ba iarap ka sorkar bad 1 lak na ka kam sengkam lajong bad kiwei.
Halor ka jingdheng kali, u Myntri Rangbah ula ong ba ka Sorkar ka don jingthmu ban shna ia ki skywalk ha kylleng ki jaka khnang ba ki paidbah kin dup mlien ban iaid kjat bad ban kiar na ka jingshong kali than bad ruh ka jingthmu ban shna ia ki ropeway ban kyntiew ia ka kam jngohkai.
Haba pynpaw ruh ba ka jingthung ia ki consultant ka long kaba donkam, ula ong ba haduh T. 15,000 klur ki project la pyntrei ha Meghalaya kaba donkam ban don ia ki consultant bad bynrap “Ngi la siew T. 20 lak man u bnai sha ki consultant bad T. 250 klur ha ka san snem”.
Halor ka jingpynkhie im ia ka Meghalaya Energy Corporation Limited (MeECL), u Conrad ula iathuh ba ula leit dang shen sha Delhi bad iakynduh ia u Myntri ka Tnad Bording ka Ri bad iakren halor kiba bun ki mat ba iadei bad ki kam pynmih bording.
“Ka jingialang ka long kaba seisoh bad ula kular ban ai ka jingkyrshan ba pura ia ngi. Ula ai ka jingbthah ba jur ia ki Ophisar ba ki dei ban ai ka jingkyrshan ia ka Sorkar Meghalaay bad ka MeECL ban pynthikna ban gin lah ban pynbeit bad wanrah ia ka MeECL na ka red light sha ka green light. Nga kyrmen ba ngin sa iohi bin pa bin ia ki jingkylla ha ka MeECL” ula bynrap.
Nalor kane, u Myntri Rangbah ula pyntip ba sa $300 million lane T. 2400 klur ki project ki dei kiba la dep mynjur na ka bynta ka MITPs. “Kane ka urlong namar ka World Bank ka kmen bad sngewtynnad ba ka Sorkar kala treikam bha” ula bynrap.
Halor ka jingdawa ia ka Sohra District, u Myntri Rangbah ula kular ba ka Sorkar kan sa pyrshang ban leh kat kaba lah ban wad ia ka lynti ha kaban pynbeit ia ka kam kaba iadei bad ka jingbym iamynjur lang hapdeng ki Nongshongshnong haba buh ha ka jingmut jingpyrkhat bad ka East Khasi Hills ka dei ka District ba bun tam ki Nongshongshnong.
