Guwahati, Jylliew 18: Kawei ka jingjia kaba jia hynne ka sngi Ba-ar, kala pynpar niangkhriat ha kylleng ka Jylla Assam, ha kaba uwei u heh ophisar IPS, la suba jur ba ula siat ïap ialade hadien ba ka kurim ka jong u kala khlad noh na ka jingpang bampong hynne ka sngi ha Guwahati.
Une u heh ophisar IPS uba la tip kyrteng kum u Shiladitya Chetia, u dei u Secretary ka Home & Political jong ka Sorkar Assam.
Katkum ki khubor bala iohlum la iathuh ba u Chetia ula bthat jubor ia la ka jingim hapoh ka Nemcare Hospital, Guwahati hadien ba ka kurim ka jong u kala khlad noh na ka jingshah bat slem ha ka jingpang Cancer.
Kane ka jingjia kala lam sha ka jingshim noh u Shiladitya ia la ka jingim, hynrei ki pulit ki dang pynlong ia ka jingtohkit bad la iathuh ruh ba u Chetia ula pyndonkam da kapistol ka jongu ban pynkut ia la ka jingim.
Ki tyllong khubor kila iathuh ba une u heh pulit ula sngewsih kthang haba ka kurim ka jong u kala iakhun la slem bha ia ka jingpang Cancer bad ka jingkhlad noh ka jong ka, kala pynlong ia utei u heh pulit ban shim noh ia katei ka sienjam ban shim syndon noh ia la ka jingim.
U Director General of Police ka Assam u Gyanendra Pratap Singh ula pynpaw ba baroh ki pulit ka Assam ki dap da ka jingsngewsih kthang halor ka jingkhlad noh une u heh ophisar pulit.
U DGP ka Assam ula pynpaw ha ka ‘X’ ka jong u, “Ka long kaei kaei ka jingjia kaba sngewsih ba u Shiladitya Chetia IPS 2009 RR, Secretary Home & Political sorkar Assam, ula shim noh ia la ka jingim hynne ka janmiet. Tang hadien katto katne minit b aula leit iakynduh ia u Doctor la pynbna ba ka kurim ka jong u kala khlad noh na ka jingpang Cancer kaba la iakhun ia katei ka jingpang la slem bha. Ka tnad pulit jong ka Assam baroh kawei ka dap da ka jingsngewsih kthang”.
U Shiladitya Chetia ha ki snem kiba la leit ula shakri kum u Superintendent of Police (SP) ka Tinsukia bad Sonitpur District jong ka Assam, ha kaba ula ioh ia ka nam bad ka burom halor ka jingshakri ka jong u.
