Shillong, Rymphang 24: The Khasi Student Union (KSU) kala kyntu iaki sengsain pyrthei ba kim dei ban ialeh Politics iaka mat jingdawa pyntreikam Inner Line Permit (ILP) hapoh ka Jylla Meghalaya ha kane ka elekshon MLA ban long la 27 tarik Rymphang.
U President ka KSU u bah Lambokstarwell Marngar ula ong ba ki sengsain pyrthei kim dei ban shim kabu ban iakren iaka mat mat jingdawa ILP tang naka bynta ka jingmyntoi shimet ne tang naka bynta ka jingmyntoi ki Party hynrei kidei ban shim khia ba kane ka jingdawa ki paidbah kan urlong noh shen.
U bah Lambok ula ong ba kila don ki katto katne ki Party kiba la bsuh iaka mat jingdawa ILP hala ki mat elekshon (Manifesto) hynrei kidei ruh ban pynthikna ba kane ka Manifesto ba kila pynmih kam dei ban shu kut tang haki kot sada.
“Ka KSU kam kwah ban iohi ba ki kyrtong ne ki sengsain pyrthei kin shim kabu hala ki rynsan ban ialap halor ka ILP tang naka bynta ban ioh jingkyrshan ha kane ka elekshon hynrei kum ka seng kaba la ieng rasong ban dawa ILP ka kwah ba ki sengsain pyrthei kidei ban pynbor iaka sorkar pdeng ban pyntreikam noh mardor iaka ILP ha Mgehalaya” la ong u bah Lambok.
U bah Lambok ula ong ba baroh 60 ngut ki MLA na ki Party bapher bapher kila ia mynjur lang daka Resolution hapoh ka ïing dorbar thaw ain ban dawa naka sorkar pdeng ban pyntreikam ILP ha Meghalaya hynrei ha kane ka kynti la iohi ba ki don katto katne ki Party kiba khlem bsuh lang iaka ILP hali ki mat (Manifesto) ilekshon 2023.
Ula kynnoh ba kane ka jingkyntait ki katto katne ki Party ban bsuh iaka mat ILP hali ki mat (Manifesto) ilekshon 2023, ka paw shai iaka jinglong arsap jong ki namar hapoh ka ïing dorbar baroh kila mynjur iaka Resolution halor kane ka mat.
“Tang kawei nga kwah ban ong sha baroh ki sengsain pyrthei ba kidei ban shimkhia ba ka sorkar pdeng ka mynjur noh iaka ban pyntreikam iaka ILP ha Meghalaya bad kidei ruh ban pynthikna ba ka Resolution bala shim hapoh ka ïing dorbar thaw ain ka jylla kam dei ban shu kut tang ha ki kot sada” la bynrap u bah Lambok.
