Tura, Risaw 14: Ka jingsaphriang ka khubor jong ka jingshah thombor u samla pule ha ka Tura Campus jongka North Eastern Hill University (NEHU) kala pynkyndit ia kiba bun bad kala don ruh ka jingdawa ia ka hok na kiba bun. Ki bor pyniaid jongka Campus kala sdang ban khmih bniah halor katei ka jingjia naduh ka sngi ba kala mih katei ka jingjia, hynrei haduh mynta wat haba kala iaid 5 sngi ruh ym pat lah ban lap ksai eiei.
Haba iakren bad Ka Shlem ha ka sngi Thohdieng, ka Campus Director ka NEHU Tura campus, ka Prof. Sujata Gurudev, kala kubur ba ka jingtohkit halor katei ka jingjia kam pat lap eiei bad haduh mynta kim pat lapksai ia kiba donkti ha katei ka kam thombor, watla ki bor pyniaid kila sdang mardor ia ka jingtohkit halor katei ka jingjia kaba la jia ha ka 8 tarik u Risaw.
Uwei u samla pule jongka Department of Agri Business Management ha NEHU, uba na Nagaland ula shah thombor bad shah leh khlem akor ha ka por 1:30 haduh 2:30 dang step phyrngab, ha ka kynhun ki samla pule kiba la pynlaw lyngkhuid bad shah kren da ki ktien kiba khor, hynrei haduh mynta ym pat lah ban ithuh ia kitei ki samla pule kiba la leh ia katei ka kam sniew.
Ki bor pyniaid jong ka Tura campus kila tip ia katei ka jingjia, hadien ba u bahaiing jong une u samla pule uba la shah pynkhlemraiñ, ula pyntip ia u Proctor jong ka campus ha ka por 8.30 mynmiet ban kylli bniah halor katei ka jingjia bad la shem ruh ba utei u samla pule ula mih noh naka Campus ha ka por 4 baje janmiet bad la u bahaiing ha katei kajuh hi ka sngi bad ym shim la pyntip eiei ia katei ka jingjia sha ki bor pyniaid.
Ki heh jong ka skulbah kila pyrshang ban iakren bad utei u samla, hynrei ula kyntait ban kren ia ki ne ban iathuh eiei shaphang katei ka jingjia.
“Ha ka 9 tarik u Risaw la pyrshang biang ban kren ia une u samla hynrei ym shim la don ha ka met ban iakren ne iakhana, kumta la sdang noh iaka jingtohkit hapoh ka Arbella Hostel, ha kaba baroh ki samla pule, ki nongap pahara, ka jingpeit bniah iaka jingrung jingmih jong baroh, la khmih bniah ruh ia ki mobile phone jong baroh bad kane ka jingtohkit kala long kaba janai bha hynrei ym shim la don uwei ruh uban iohsngew eiei ne ban iohi eiei bad wat u samla pule uba sahlang ha kajuh ka kamra ruh ym tip eiei ba utei u samla ula mih noh na ka campus,” la iathuh ka Prof. Gurudev.
Ha ka jaka ban yn iathuh lem ia ka jingshah thombor ka jongu, hynrei ula iathuh ia u samla pule uba sahlang ha kajuh ka kamra ba u Kpa jongu ula mad iaka jingaksiden kumta u hap ban leit noh mardor.
Ki bor pyniaid kila tohkit biang ha ka 10 tarik u Risaw hynrei kim shim la lapksai eiei namar ba ym don ba tip eiei ne ban iohsngew eiei halor katei ka jingjia.
Ha ka 11 tarik u Risaw, ki bor pyniaid ka skulbah kila pyrshang ban ioh iakren bad u samla pule uba shah thombor da ka jingkyrmen ba kin iohksai eiei khnang ba kin lah ban pyniaid shakhmat ia ka jingtohkit hynrei kim shym la iohlad ban iakren bad une u samla pule.
Ha kane kajuh hi ka sngi, ia kane ka jingjia la aiti noh ha ka Campus Disciplinary Committee bad kumta kala khmih bniah ha baroh ki liang bad kala kylli bniah ia ki samlapule bad ia baroh bad kane ka jingtohkit kala sdang naduh ka por 10 baje mynstep haduh ynda la miet bha hynrei ym shim la iohksai eiei.
Ha ka 12 tarik, ka Committee kala pyrshang ban ioh ia ki jingtip na une u samla uba shah thombor ban iakren Online ha ryngkat ka jingdon ki kmie ki kpa jongu hynrei une u samla ym shim la kren eiei bad u don hapdeng jongka met ka bym koit, kaba la ktah na ka kam thombor kaba la leh pyrshah ia u.
Ki pulit ka jylla haka 12 tarik u Risaw, kila sdang ia ka jingtohkit ka jongki halor katei ka jingjia ha kaba kila poi ha ka skulbah bad kila tohkit halor katei ka jingjia baroh bad kila kylli bniah na ki samla pule.
Ka Prof. Gurudev kala ong, ba ki pulit kila shimti ia ka jingtohkit halor katei ka jingjia bad bad ka sngew ba kane ka long kaba biang ban lap lut ia ki jingshisha khamtam haba ki ngeit ba katei ka jingshah thombor u samla pule kadei ka kam runar.
Kala iathuh ruh ba ka campus baroh kawei haduh mynta ka don hapdeng ka jingkyndit bad ka jingbym lah ban mutdur halor katei ka jingjia bad baroh ki ap khmih lynti ba ka jingshisha kan mih noh mardor.
Ha kajuh ka por ka Fact Finding Committee na Shillong Campus, NEHU kala wan poi ha Tura ha ka sngi Thohdieng ban tohkit halor katei ka jingjia ha kaba la ai ka jingbatai kaba bniah ia ki shaphang ka jingtohkit bad iaka jinglong jingman haduh mynta.
Watla ka skulbah ka dang iaid shakhmat iaka kam tohkit mynta la 5 sngi bad na ka liang ki pulit ruh kila pynlong ia ka jingtohkit, hynrei haduh mynta kim shym la lapksai eiei halor kiba donkti ha katei ka kam sniew.
