Nongstoin, Risaw 18 : Ka Hynniewtrep Youth Council –West Khasi Hills, kala dawa ia ka tnad Khlaw ka Jylla, ba kam dei ban ai ‘Clearance Certificate’ ia ka karkhana M.D Ferro Alloy ba kan treikam ha Umjaru, Rwiang, West Khasi Hills.
Ha kajuh ka por, kane ka seng kala dawa ruh ba lada ka Tnad kala dep ai ruh ia ka ‘Clearance’, ka dei ban pynduh pyndam noh ia ka.
Ia kane ka jingdawa la leit buh lyngba a shithi hakhmat u District Forest Officer ka West Khasi Hills hynne ka sngi Balang, uba la kular ba un sa pynpoi ia kane ka shithi sha ki bor ba halor jong ka Tnad.
“Ngim kwah ba ka tnad Forest ne Meghalaya State Pollution Control Board (MSPCB) ba kin ai ‘Clearance’ ia kane ka karkhana. Ka jingpyrshah ka long ba kane ka karkhana kan sa pynjot ia ka mei mariang khamtam ba ka dei kaba don hajan jong ka wah” ong u samla Wanteibok Lyngdoh, General Secretary ka seng.
Kat kum ka jingong jong u, ka jingwan kane ka karkhana kan ym wanrah jingmyntoi satia ia ki paidbah hynrei tang ki jing pynjot ia ka sawdong sawkun. U ong ba kiban ioh jingmyntoi hi kin dei tang ki katto katne ngut ki briew.
Une u Nongialam ka HYC-WKH ula pyntip ba ha ki khyndiat bnai bala leit, ka Seng kala leit iakynduh ruh ia u Deputy Commissioner ka District ban dawa pynlong da ka Public Hearing halor ka jingwan treikam kano ka kompani hapoh ka thain.
“Ngi la ioh ia ka jubab na u DC ryngkat ka shithi na ka MSPCB ba ong ba lada katei ka karkhana ka pynmih mar kumta 30,000 ton shisnem, ka long kaba donkam ban pynlong ia ka Public Hearing” ula ong.
Ula ong, ka seng kan buddien ia ka jingdawa ban pynlong ia kane ka Public Hearing nalor ban buddien ruh ia kiwei kiwei ki karkhana kiba don hapoh ka District.
