Shillong Jylliew 28: Ka Khasi Students Union (KSU), hynne ka sngi Balang kala leit pynkynmaw iaka Executive Committee (EC) ba thymmai jong ka Khasi Hills Autonomous District Council (KHADC) ba ialam da u Bah Pyniaid Sing Syiem kum u CEM, ba kam bit ban shah ban tih ia u Uranium uba don ha kane ka jylla.
“Ngi ioh ia ki khubor ba ki wan ki briew na ka sorkar pdeng ban iasyllok bad ki paidbah kiba sah ha ka thaiñ, ki trai iing, trai khyndew halor ka jingkhang ban pyrshah ban tih Uranium.
Kane ka kam kam shym la kut hynrei kala iaid napoh napoh bad dei halor kane ka nongrim ngi wan ban pynkynmaw iaka District Council ba kam bit ban shah ban tih ia u Uranium” ong u Lambokstarwell Marngar haba iakren bad ki nongthoh khubor.
U Nongialam ka KSU ula ong, ba ka jingkhang kyrdep ka UCIL iaka ophis jongka ha nongbah Shillong kadei tang ka jingpynthame ia ki paidbah ba kan ym iaid shuh shakhmat hynrei kaei kaba jia ha madan pat ka long, ba ki pyrshang ban tynruh sharum bad shaneng bad ka sorkar India kam shym la shongthiat ban ioh tih ia u Uranium uba don ha kane ka jylla.
Na ka liang u CEM ka KHADC ula ong ba ka Council ka pyrshah jur ban tih ia u Uranium bad kan ym ai jingbit satia ban tih ia utei u marpoh khyndew.
“Ngi la kren da kaba shai ba ka EC kaba thymmai ka ieng pyrshah ban ai kano kano ka jingbit ia ka sorkar jylla ne sorkar pdeng ban wad bniah ne ban tih ia u Uranium kaban long ka jingma ia ki paidbah kiba sah ha katei ka jaka bad kaban ktah ruh ha ka liang ka koit ka khiah ia ki nongshong shnong” ong u Bah Pyniaid haba iakren bad ki nongthoh khubor.
Nalor kane ka KSU kala dawa ruh na ka KHADC ba kam dei ban ailad ba ki jaka ha ka rilum Khasi kin kylla long kum ki jaka jong ki len shipai namar la sakhi ba bun ki jingjia kila mih na ka jingdon ki len shipai.
“Ngi la ju iohsngew ruh na ka por sha ka por iaka jingwad jaka jong ki shipai bad ngi sngewtynnad ba ka KHADC kan ym leh kyrkieh hynrei kan peit bniah bha namar kam kwah ba ki jaka ki puta hapoh ka bri u Hynniewtrep kin kylla kum ki len shipai” ong u Lambokstarwell Marngar.
Pule lang ia kane: Buh jingkylli ka NESO ia ka Sorkar India ioh don ka plan buhrieh ba ailad ban bteng ki kam umsnam ha Manipur
Peit lang ia kane
