“Wat ai jingbit ban pynlong Yatra khang bam doh masi ha Shillong” dawa sa ka VPP ia ka Sorkar

Shillong, Nailur 15 : Ka Voice of the People’s Party (VPP) kaba don ha ka Liang Pyrshah, ha ka sngi Nyngkong, kala dawa ia ka Sorkar Jylla ba kam dei ban ai jingbit ia ka kynhun hindu ba ialap khang bam doh masi ban pynlong ia ka jingiaid paidbah- ka Gau Dhwaj Sthapana Bharat Yatra bala buh ban pynlong ha ka 2 tarik Risaw ha Shillong.

Ha ka shithi bala phah sha u Myntri Rangbah ka Jylla Conrad K Sangma, u General Secretary ka VPP bad MP ka Shillong Dr Ricky AJ Syngkon ula ong “Da kaba pyrkhat ia ka jinglong jong ka imlang sahlang jong ka jylla jong ngi, ngi kyntu jur ia ka sorkar ba kam dei ban ailad ia ka yatra ba kan long. Ka jingshngain , ka jingsuk bad jingiatylli jong ki paidbah ka Meghalaya ka dei ban long ka mat ba kongsan tam jong ka sorkar, bad kano kano ka jingjia kaba buh jingma ban pynthut ia kine ki jinglong kam dei ia ka ban shah.”

“Watla ngi kyrshan bad bat ia ka nongrim jong ka jinglaitluid ha ka niam, kaba la pynrung ha ka riti synshar jong ngi, ngi sngewkhia jur ia ki jingktah kiba lah ban mih na kum kane ka prokram ia ka jingiashongsuk iashongsain ha ka Jylla jong ngi” ula ong haba bynrap ba ka VPP ka ngeit ha ka jing laitluid ba shimet ban leh niam hala ka jong ka jingngeit, hynrei lada ka jingleh niam ba laitluid ka ktah pat ia kiwei lane pyrshang ban pynjari ia ki jingngeit ha kaba iadei bad kaei kaba ki briew ki dei ban bam, kumno ki dei ban im, ne kaei kaba ki dei ban ngeit, te kum kine ki kam ki buh jingma ia ka jinglong tynrai jong ka imlang sahlang jong ngi hi. Ka Meghalaya ka dei ka jylla kaba iatip ia ka jingdon ki jaidbynriew bapher bapher, ka jingsuk bad ka jingburom markylliang.

Ula ong ba ka hap ban da leh phikir bha ia kano kano ka kam kaba lah ban pynmih ia ka jingkulmar ne pynmih ia ka jingiakynad hapdeng ki jaitbynriew bapher bapher.

“Ngi don ka jingsngewkhia ba kane ka jingthmu ban pynlong ia ka yatra ka lah ban wanrah ia ka jingiapher bad pynthut ia ka jingiashong suk lang jong ki jaitbynriew ha Meghalaya. Dei ban burom ia ka kolshor jong ki jaidbynriew bapher bapher ha ka imlang sahlang, bad ngim lah ban ailad ia kine ki prokram kiba lah ban tynjuh ia kane ka jingia burom mar kylliang,” ong u Bah Ricky.