Shillong, Risaw12: Ka state-level mock exercise bala pynlong da Meghalaya State Disaster Management Authority ha ka sngi Palei, kala wanrah ia ka jingdheng kali kaba jur ha bun ki jaka ka Nongbah Shillong, kaba dukha mynsiem ia kiba bun ban poi sha ka jaka ba ki leit ha ka por kaba biang.
Ka Deputy Commissioner & Chairperson ka DDMA ka East Khasi Hills, Shillong, kala pynlong ia ka Mock Drill ha ka sngi Palei ba pyniasyriem ia u jumai 1897, naduh ka por 9 baje mynstep. Ha kane ka mock drills la iashimbynta da ki Heh Ophisar ka District, ki shipai, ki paramilitary, NDRF, SDRF, ki Pulit, Fire & Emergency Services, Sengbhalang, Hospital, skul, College bad ki nongkitkam shnong nalor kiwei kiwei.
U Nongmihkhmat naka National Disaster Management Authority (NDMA) ruh ula iadonlang ha kane ka Drill.
Hynrei, ki Nongshongshnong kila pynphriang ia ki video ba pyni ia ka jingsahkut kali ha kylleng ki jaka khamtam ha ki thain Polo, kaba don kane ka mock drill.
Kiba bun ki riew paidbah kila ban jur ia ka jingkongsan ba ki briew ki donkam ban poi sha ki jaka trei, ki Ophis, ki skul bad college ha ka pork aba biang.
Ha East Khasi Hill, ki jaka kiba la ithuh ban pynlong ia ka mock drill ki kynthup ia ka Polo, ka surok na Polo sha Wahiingdoh, Polo Supermarket, ki dukan ha thain Polo, Hotel Polo Tower, SBI Building, Polo bad MeECL, Lumjingshai, Samkhamti Petrol Pump ha Urkaliar, Female Health Worker Training School, School of Nursing ha TTC, Ganesh Das Govt MCH, St Xavier School ha Polo, Pynthorumkhrah Golflink, Shillong Secondary School, Forest Colony, bad Civil Hospital School of Nursing.
Watla ka bor District kam shym la pynbeit bujli ia ki lynti iaid, hynrei kala kyntu ia ki Nongshongshnong ba kim dei ban khuslai bad ban ai ka jingiatreilang bad ka jingpynbeit jong ka Sorkar Jylla da kaba pyrkhat lypa iaka jingleit jingwan jong ki khnang ban kiar na ka jingslem ba dkeng kali.
