Nongpoh, Iaiong 30: Hapdeng ka jingiam briew bad ka jingpaitdohnud, ki bahaing hasem, kiba ieid ba thoin lem bad ki nongshong shnong jongka thain Marngar baroh kawei, hynne ka sngi U Blei ki la pdiang ia ka met kaba sah jong ka samla Walinda Binong, kaba la suba shah pyniap hapoh ka kamra sah jong ka Girls Hostel ka Modi University , Rajasthan ha ka 27 tarik mynta u bnai.
Ia ka met kaba sah jong katei ka samla, la leit ban shimti da u kpa jongka, u Bah Ruby Binong lem bad ki bahaing hasem ha ka jingsynran lang ki bor pulit ka jylla, na Rajasthan bad la pynkit da ka liengsuin haduh ban poi ha ka kad liengsuin jong ka nongbah Guwahati bad nangne la pynkit pat ka kali kit metiap tad haduh ban poi ha ka shnong ha Nongagang Marngar ha Ri Bhoi District.
La iohi ruh ia jingiam briew bad sngewsih kthang jong ki bahaing hasem, kiba ieid ba thoin bad ki paidbah nongshong shnong ka thain Marngar tang mar ia poi ka met jong katei ka samla ha ingsah ka jongka, naba kim sngewlah ngeit bad mutdur satia ba kum kane ka apot kan wan jia ia katei ka samla kaba stad kaba shlur bad kaba don ruh ia ka lawei kaba phyrnai.
Hashwa ba ia ka met jong katei ka samla yn rah shapoh ing, na ka liang ki nongialam ka thain Marngar ki la pynlong ruh ia ka jinglehniam lehrukom katkum ka dustur Khasi ban knia ban khriam naba ki la ong kadei ka jingiap mynsaw lane kata ka jingsuba shah pyniap.
Ia ka jingleh niam ba khatduh yn pyndep lashai ka sngi da kaba thang katkum ka dustur Khasi hapoh ka jaka thang briew jong ka thain Marngar.
Haba iakren bad u kpa katei ka samla, u Bah Ruby Binong, u la pynpaw ba naka liang ka jong u hi shimet da leilei um pdiang satia ba ka khun ka jong u, kaba stad, kaba shlur bad kaba shemphang, kan shim kat ia katei ka sienjam ban bthat jubor iala ka jingim bad ba um sngewiahap hi ruh bad ka jingkam jong ki bor ba dei khmih ka Mody University ba ka khun jong u, ka la dih dawai bih bad phasi ialade.
U Bah Ruby u la iathuh ruh ba dang ha ka 26 tarik nohphai sngi, kata shisngi hashwa katei ka jingjia, ka khun ka jong u ka dang phone iala ka kmie ban pyntip ia kiei ki jingleh (activity) ki jongka hapoh katei ka skul bah bad ba kan leit ruh ban iadon bynta haka jingniah kulai lane kata ka Horse Riding haka por janmiet.
Hynrei kynsan kynsan kumba iuh tdong bsein, ha ka sngi kaba bud, kata ha ka 27 tarik, u la ioh ia ka phone na ki bor katei ka skulbah kiba la bthah ia u ba udei ban leit kyrkieh sha katei ka jaka pule, naba ka khun jong u ka la shitom jur, la iathuh u Bah Binong da kaba bynrap ba ha jingshisha u mut ban leit ha katei hi ka sngi, hynrei namar ka jingbym ioh ticket liengsuin shuh, u la hap ban leit noh ha ka step kaba bud kata ha ka 28 tarik.
Ha ka janmiet jong ka 28 tarik, u Bah Ruby u la iathuh ba u la poi sha katei ka skul bah daka jingkyrmen ba un iohi dala ki khmat iala ka khun, hynrei phewse, ia ka khun ka jongu, ki bor pyniaid katei skul bah kila dep ban pynkit hi sha ka CHC ha Lakshimmgarh khlem ka jingdon lang ki bor pulit lane ki bahaing hasem. U la iathuh ba ha ka jaka ba kin ialam beit ia u sha katei ka CHC, pynban la phah rung ia u sha ka conference hall jong katei ka skulbah ha kaba ki bor pyniaid ki la pyntip ba ka khun ka jong u ka la dih dawai bih bad phasi ialade.
Da ka jingbym sngewlah ngeit ia katei ka jingkam jong ki bor katei ka skulbah, na ka liang ka jong u lem bad ki bahaing hasem bad ki paralok, ki la buh jingkylli ruh ia uwei u nonghikai katei ka skulbah halor katei ka jingjia, hynrei utei u nonghikai u khlem treh satia ban jubab bad phet syndet na katei ka jaka, kaba la pynbitar shla iaki.
U Bah Ruby u la iathuh ruh ba ha ka jingshisha na ka liang ki bor pyniaid katei ka skulbah ki kwah ban leh post mortem da uwei u doctor, hynrei na ka liang ka jong u, kum u kpa, u dawa ba dei ban leh da ka Medical Board kaban don kumba lai ne saw ngut ki doctor, bad ia kane la pdiang kumba u la dawa. Hynrei u la pynpaw ba shiteng na kane ka post mortem report um pdiang satia bad ban jur ba ka khun ka jong u kan nym leh satia ia katei ka kam ban shim kat iala ka jingim, naba kadei ka briew kaba shlur, kaba stad bad kaba iathuh hok.
Halor kane ka jingjia, u Bah Ruby Binong kum u kpa, u la kyntu jur ia ki bor jong ka sorkar jylla ba kin shimkhia ban pynlong ia ka jingtohkit kaba thikna ban lap ia ki jingshisha baroh bad ruh ba ka sorkar kan shim ruh ia ki lad ki lynti nangne shakhmat ban pynthikna ba ki hajar ngut ki khun samla ka jylla kiba leit ban wad jingstad bad trei sha ki bynta bapher bapher jong ka Ri, ba kin don ia ka jingshngain bad lait na kine ki jingjia kumba la wan jia ha ka khun ka jong u.
Na ka liang u Bah O Binong, Rangbah Shnong ka Nongagang Marngar u la pynpaw ia ka jingsngewsih bad sngewkhia jur halor kane ka jingjia kaba la wanrah ia ka jingduh noh khlem dei por ia ka khun samla jong ka shnong bad dawa ruh na ka sorkar ba kadei ban shimkhia ban leh ia kaba donkam khnang ba kum kine ki jingjia kin nym wan jia shuh hadien habud ia ki khun samla ka jylla bad ka thain shatei lam mih ngi hi baroh kawei.
